Kapitujt

Veprat e Apostujve: 18. Pali në Korint

¹ Pastaj Pali e la Athinën e shkoi në Korint.

² Aty gjeti një çifut që quhej Akuil, me prejardhje nga Ponti, që posa kishte arritur prej Italisë me Prishilën, bashkëshorten e tij, sepse Klaudi kishte pasë dhënë urdhër ta linin Romën të gjithë hebrenjtë. Pali shkoi te ta ³ e, pasi kishin të njëjtën zeje, banonte te ta dhe punonte. Ishin mjeshtër tendash. ⁴ Pali çdo të shtunë e merrte fjalën në sinagogë dhe mundohej t’i bindë hebrenjtë e grekët.

⁵ Kur Sila e Timoteu arritën prej Maqedonisë, Pali iu kushtua krejtësisht fjalës, duke dëshmuar para hebrenjve se Jezusi është Mesia. ⁶ Por, pasi ata kundërshtonin dhe blasfemonin, ai i shkundi petkat dhe u tha: “Gjaku juaj mbi kokën tuaj! Unë nuk kam faj! Që tani unë po u drejtohem paganëve!” ⁷ U largua prej andej dhe shkoi në shtëpinë e një njeriu që besonte në Hyjin. Ky quhej Ticje Just, shtëpia e të cilit ishte afër sinagogës. ⁸ Krispi, kryetari i sinagogës, besoi në Zotin, ai dhe krejt familja e tij. Po edhe shumë korintas, duke dëgjuar Palin, pranonin besimin dhe pagëzoheshin.

⁹ Një natë Zoti i tha Palit në vegim: “Mos u tremb, por fol e mos hesht! ¹⁰ Unë jam me ty! Askush s’do të guxojë të vërë dorë në ty për të salvuar, sepse në këtë qytet kam një popull të madh!”

¹¹ Kështu Pali zuri vend aty një vit e gjashtë muaj duke predikuar ndër ta fjalën e Hyjit.

¹² Kur Galioni ishte prokonsull i Akajës, çifutët në përkim të plotë u çuan kundër Palit, e nxorën në gjyq ¹³ dhe thanë: “Ky nxit njerëzit që ta nderojnë Hyjin kundër Ligjit.” ¹⁴ Pikërisht kur Pali deshi të flasë, Galioni u tha judenjve: “Po të ishte çështja e ndonjë delikti apo e ndonjë vepre të keqe, ju kisha vështruar, o hebrenj, siç e kërkon e drejta; ¹⁵ porse, pasi çështja është lidhur me fjalë, emra e Ligjin tuaj, rregullojeni ju vetë; lidhur me këso gjërash unë nuk dëshiroj të bëhem gjykatës.” ¹⁶ Dhe i dëboi nga gjykatorja. ¹⁷ Por ata të gjithë e kapën kryetarin e sinagogës, Sostenin, dhe filluan ta rrahin para gjykatores. Galioni aspak nuk e çau kokën për këtë gjë.

Pali kthehet në Antioki

¹⁸ Pali qëndroi në Korint edhe mjaft kohë, pastaj u përshëndet me vëllezërit dhe me barkë u nis për Siri bashkë me Prishilën e me Akuilën, pasi në Kenhrejë e qethi kokën, sepse e kishte bërë kusht.

¹⁹ Kur mbërritën në Efes, ata i la aty e vetë hyri në sinagogë për të diskutuar me çifutë. ²⁰ Këta i bënë lutje të qëndronte tek ata për një kohë të gjatë, por ai nuk deshi, ²¹ e, duke u përshëndetur, u tha: “Në dashtë Zoti do të vij te ju një herë tjetër.”

Dhe u nis prej Efesit.

²² Kur arriti në Cezare, u ngjit të përshëndesë Kishën e atëherë zbriti në Antioki. ²³ Edhe aty ndenji disa kohë. Pastaj u nis të përshkojë krahinën e Galacisë e të Frigjisë duke i përforcuar në fe të gjithë nxënësit.

Apoloni predikon në Efes

²⁴ Një farë hebreu që quhej Apolon, me prejardhje nga Aleksandria, kishte ardhur në Efes. Ishte njeri gojëmbarë dhe njohës i mirë i Shkrimit të shenjtë. ²⁵ Ishte i njoftuar me Udhën e Zotit dhe me plot zell të shpirtit fliste dhe mësonte me kujdes për Jezusin, edhe pse dinte vetëm për pagëzimin e Gjonit. ²⁶ Ai, pra, filloi të flasë plot guxim në sinagogë. Kur e dëgjuan Prishila e Akuila, e morën në shtëpi të tyre dhe ia shpjeguan imtësisht Udhën e Hyjit. ²⁷ Kur iu mbush mendja të shkojë për Akajë, vëllezërit i dhanë zemër dhe u shkruan nxënësve që ta presin mirë. Kur arriti atje, për hir të Zotit, u vlejti shumë besimtarëve ²⁸ sepse me aftësi të madhe i hidhte poshtë judenjtë duke ua vërtetuar me anë të Shkrimit të shenjtë se Jezusi është Mesia.

Kapitujt