Kapitujt

Dalja: 24. 3. LIDHJA E BESËLIDHJES

¹ Atëherë i tha Moisiut: “Ngjitu te Zoti ti e Aroni, Nadabi e Abihui dhe shtatëdhjetë pleq prej Izraelit e adhuroni prej së largu. ² Vetëm Moisiu le të ngjitet te Zoti, por këta të mos afrohen, dhe as populli të mos ngjitet me të”.

³ Moisiu erdhi dhe i tregoi popullit të gjitha fjalët e Zotit dhe rregulloret. Mbarë populli u përgjigj njëzëri: “Do t’i zbatojmë të gjitha fjalët që i tha Zoti”.

⁴ Moisiu i shkroi të gjitha fjalët e Zotit. Në mëngjes hëngri dhe e ndërtoi një lter rrëzë malit, me dymbëdhjetë gurngulur për dymbëdhjetë fiset e Izraelit. ⁵ Atëherë u urdhëroi të rinjve të Izraelit të flijojnë flitë e shkrumbimit. Flijuan edhe flitë e pajtimit viça në nder të Zotit. ⁶ Moisiu mori gjysmën e gjakut dhe e qiti në disa enë, kurse gjysmën tjetër e derdhi mbi lter.

⁷ Atëherë mori Librin e Besëlidhjes dhe ia lexoi me zë të lartë popullit e populli u përgjigj: “Gjithçka tha Zoti do të zbatojmë e do të jemi të dëgjueshëm”.

⁸ Atëherë Moisiu e mori gjakun dhe e stërpiku popullin e tha: “Ky është gjaku i Besëlidhjes që Zoti e lidhi me ju në mbështetje të të gjitha këtyre fjalëve”.

⁹ Atëherë Moisiu u ngjit me Aronin, Nadabin e Abihuin dhe me shtatëdhjetë pleqtë e Izraelit. ¹⁰ Dhe e panë Hyjin e Izraelit: nën këmbët e tija thuajse shtroja prej gurëve të paçmueshëm të safirit e shkëlqyeshme pothuajse si vetë qielli kur është i kthjellët. ¹¹ As dorën e vet nuk e ngriti mbi të zgjedhurit e Izraelit: mundën ta shikojnë Hyjin. Hëngrën e pinë.

Moisiu në mal

¹² Zoti i tha Moisiut: “Ngjitu tek unë në mal e qëndro aty. Do t’i jap rrasat e gurit, ligjin dhe urdhërimet që i kam shkruar për t’i mësuar”.

¹³ U ngritën Moisiu dhe Jozuehi, përcjellësi i tij. Duke u nisur Moisiu për malin e Hyjit, ¹⁴ u tha pleqve: “Pritni këtu deri që të kthehemi te ju. Me ju janë Aroni dhe Huri, nëse lind ndonjë çështje, drejtohuni atyre”.

¹⁵ Moisiu u ngjit në mal dhe reja e mbuloi malin.

¹⁶ Lavdia e Zotit erdhi të banojë në mal të Sinait dhe reja e mbuloi gjashtë ditë. Të shtatën ditë Hyji e thirri prej resë Moisiun.

¹⁷ Lavdia e Zotit u dukej në sy të bijve të Izraelit në trajtë të zjarrit përpijës në majën e malit. ¹⁸ Moisiu u fut në re dhe u ngjit në mal. Qëndroi atje dyzet ditë e dyzet net.

Kapitujt