Kapitujt

Efesianëve: 5. Jetoni porsi bij të dritës

¹ Përngjajini Hyjit porsi bij të dashur ² dhe jetoni në dashuri, sikurse Krishti na deshi ne dhe për ne ia flijoi vetveten Hyjit porsi kusht e fli “që jep erë të mirë”.

³ Fëlligështia ose çdo lloj papastërtie ose lakmimi as të mos zihet në gojë ndër ju, siç u ka hije shenjtërve. ⁴ Po as llafe të ndyta, as marri, as fjalë me dy vështrime që nuk kanë hije, por më mirë falënderime. ⁵ Sepse dijeni mirë këtë: asnjë fëlligështar, asnjë kurvar, asnjë lakmues pasurie ‑ që është idhujtar ‑ nuk ka pjesë në Mbretërinë e Krishtit e të Hyjit.

Jetoni porsi bij të dritës

⁶ Askush të mos ju gënjejë me fjalë të kota: për këto gjëra bie hidhërimi i Hyjit mbi njerëzit e padëgjueshëm. ⁷ Mos kini, pra, kurrgjë të përbashkët me ta!

⁸ Po, dikur ishit errësirë, por tani jeni dritë në Zotërinë. Jetoni porsi bij të dritës. ⁹ Fryti i dritës është: mirësia, drejtësia, e vërteta ‑ ¹⁰ vendosni të bëni çka i pëlqen Hyjit! ¹¹ Mos kini pjesë në veprat e pafrytshme të errësirës, por përkundrazi, më mirë zbulojini! ¹² Sepse veprat që këta njerëz i bëjnë fshehtazi është turp edhe të fliten! ¹³ E çdo gjë që zbulohet, del në dritën e vet të vërtetë, ¹⁴ sepse çdo gjë që është e zbuluar, është dritë. Prandaj thotë:

‘Zgjohu ti që fle,

ngrihu nga të vdekurit,

dhe do të të shndrisë Krishti!’

¹⁵ Vëreni me kujdes si jetoni: jo si njerëz të marrë, por si njerëz të urtë, ¹⁶ të cilët dinë ta shfrytëzojnë mirë kohën, sepse ditët janë të këqija. ¹⁷ Prandaj mos jini të paarsyeshëm, por të dini ta kuptoni mirë vullnetin e Zotit. ¹⁸ Mos u dehuni me verë, në të cilën është shfrenia, por mbushuni me Shpirtin Shenjt. ¹⁹ Thoni së bashku psalme, himne e këngë të përshpirtshme! Këndoni e lavdëroni Zotin në zemrat tuaja! ²⁰ Gjithmonë dhe për çdo gjë falënderoni Hyjin Atë në emër të Zotërisë tonë Jezu Krishtit!

²¹ Nënshtrohuni njëri‑tjetrit në frikën e Krishtit!

Bashkëshortët

²² Gratë le t’u binden burrave të vet sikurse Zotit. ²³ Sepse burri është kryet e gruas sikurse edhe Krishti është kryet e Kishës ‑ Ai, Shëlbuesi i Trupit. ²⁴ Pra, sikurse Kisha i nënshtrohet Krishtit, ashtu edhe gratë le t’u binden burrave të vet në gjithçka.

²⁵ Ju, o burra, duajini gratë tuaja sikurse Krishti e ka dashur Kishën dhe e ka flijuar vetveten për të ²⁶ për ta bërë të shenjtë duke e pastruar me larje dhe me fjalë, ²⁷ që të bënte gati për vete një Kishë të lavdishme, të panjollë, të parrudhë, pa ndonjë gjë si këto, të jetë e shenjtë dhe e patëmetë.

²⁸ Në këtë mënyrë duhet që edhe burrat t’i duan gratë e veta ‑ porsi trupin e vet. Kush e do gruan e vet, do vetveten. ²⁹ Sepse askurrë askush nuk e urren trupin e vet, por e ushqen dhe kujdeset për të, porsi Krishti për Kishën. ³⁰ Sepse jemi gjymtyrët e Trupit të tij. ³¹ ‘Për këtë arsye njeriu do ta lërë babain dhe nënën e do të jetojë bashkë me gruan e vet e të dy do të jenë një trup i vetëm.’ ³² Ky është mister i madh: e kam fjalën në lidhjen e Krishtit me Kishën.

³³ Shkurt, për sa u përket juve, secili prej jush le ta dojë gruan e vet porsi vetveten e gruaja le ta nderojë burrin e vet.

Kapitujt