Kapitujt

Levitiku: 3. Flia pajtimore

¹ “Nëse ndokush kushton një fli pajtimi: Në qoftë se paraqet bagëti të trashë, mashkull ose femër, të patëmetë, le t’ia kushtojë Zotit. ² Le ta vërë dorën e vet mbi kokë të flisë së vet dhe le ta presë në hyrje të Tendës së takimit. Priftërinjtë, bijtë e Aronit, le ta derdhin gjakun gjithreth lterit ³ dhe prej flisë së pajtimit le t’ia kushtojnë Zotit si fli shkrumbimi dhjamin që i vesh zorrët, gjithë dhjamin ndër zorrë, ⁴ të dy veshkat me dhjamin që i mbështjell, e dhjamin e të hollit dhe rizën e mëlçisë: le ta nxjerrë edhe atë bashkë me veshkat. ⁵ Atëherë bijtë e Aronit le t’i djegin këto pjesë mbi lter me flinë e shkrumbimit, që është përmbi dru në zjarr. Le të jetë fli e djegur e erëndshme në nder të Zotit.

⁶ Nëse ndokush i paraqet Zotit për fli të pajtimit një bagëti të imët, le ta kushtojë të patëmetë, qoftë mashkull, qoftë femër. ⁷ Nëse i paraqet Zotit qengj, ⁸ le ta vërë dorën e vet mbi kokë të flisë së vet dhe le ta presë para Tendës së takimit. Bijtë e Aronit le ta derdhin gjakun e tij gjithreth lterit. ⁹ Le t’i kushtojë prej flisë se pajtimit si fli të erëndshme Zotit: dhjamin e krejt bishtin duke e prerë mu te kurrizi, të nxjerrë edhe dhjamin që i mbështjell zorrët dhe tërë dhjamin e barkut, ¹⁰ të dy veshkat me dhjamin në ijë, rizën e mëlçisë: le ta nxjerrë edhe atë me veshkat. ¹¹ Prifti le t’i djegë të gjitha këto mbi lter: është një ushqim i shkrumbuar në nder të Zotit.

¹² Nëse kushton dhi, le ta sjellë para Zotit, ¹³ le ta vërë dorën e vet mbi kokë të saj dhe le ta presë para Tendës së takimit. Bijtë e Aronit le ta derdhin gjakun e saj rreth lterit. ¹⁴ Prej saj le të nxjerrë kushtin e vet si fli shkrumbimi në nder të Zotit, d. m. th. dhjamin që vesh rropullitë dhe i gjithë sa është ndër zorrë, ¹⁵ dy veshkat me dhjamë që i vesh ato deri në të hollë si dhe rizën e mëlçisë: le ta nxjerrë edhe atë me veshkat. ¹⁶ Prifti le t’i djegë të gjitha mbi lter: si ushqim, shujtë e djegur, erë zbutëse në nder të Zotit. I tërë dhjami i përket Zotit.

¹⁷ Le të jetë ky një ligj i përhershëm ndër të gjitha breznitë tuaja, në çfarëdo vendi që do të banoni: nuk guxoni assesi ta hani as dhjamin as gjakun.”

Flia për mëkate:

a/ të kryepriftit

Kapitujt