Kapitujt

Ligji i Përtërirë: 12. Vendi i kulit hyjnor

¹ “Këto janë ligjet e rregullat, që duhet t’i zbatoni në tokën që Zoti, Hyji i etërve të tu, ka për të ta dhënë për pronë për të gjitha ditët që do të jetosh mbi tokë^.

Vendi i kulit hyjnor

² “Rrafshoni të gjitha vendet, në të cilat popujt që do t’i pushtoni, i kanë nderuar hyjnitë e veta, qoftë mbi male të larta, në kodra e nën lëndë të gjelbra. ³ Rrënoni lterët e tyre, thyeni gurëngulurit, digjni në zjarr banirët, copëtoni idhujt, zhduki emrat e tyre nga vende! ⁴ Për Zotin, Hyjin tuaj, mos bëni si bëjnë ata, ⁵ por kërkojeni atë në banesën e tij, në atë vend që Zoti, Hyji juaj, ka për ta zgjedhur mes të gjithave fiseve tuaja për ta cendosur Emrin e vet; atje shkoni ⁶ dhe paraqitni flitë e shkrumbimit e theroret tuaja, të dhjetat dhe ndihmesat e duarve tuaja, kushtet dhe dhuratat, të parëlindurit e gjedhëve e të bagëtive të imëta. ⁷ Aty, në praninë e Zotit, Hyjit tuaj, hani e gëzohuni ju e familjes tuaja për të gjitha veprat e duarve tuaja, në të cilat do t’ju ketë bekuar Zoti, Hyji juaj.

⁸ Nuk do të bëni as kështu si bëjmë ne sot këtu, ku secili bën si i duket drejt, ⁹ sepse ende deri në kohën e tashme nuk keni arritur në vendin e Pushimit e në trashëgimin që Zoti, Hyji juaj, do t’jua japë. ¹⁰ Do të kaloni përtej Jordanit e do të ngulni në tokën që Zoti, Hyji juaj, do t’jua japë për pronë, që t’ju lënë në qetësi të gjithë armiqtë tuaj përreth e të banoni pa kurrfarë frike. ¹¹ Atëherë, në vendin që Zoti, Hyji juaj, do ta zgjedhë për banim të Emrit të tij, atje do t’i bini të gjitha ato që unë ju urdhëroj: flitë e shkrumbimit, flitë e tjera tuajat, të dhjetat, ndihmesat e duarve tuaja, dhe të gjitha dhuratat e zgjedhura që t’ia kushtoni Zotit. ¹² Aty do të gëzoheni në praninë e Zotit, Hyjit tuaj, ju, bijtë e bijat tuaja, shërbëtorët e shërbëtoret tuaja edhe leviti, që banon në qytetet tuaja, sepse ai nuk ka pronë as pjesë në mesin tuaj.”

Përcaktime lidhur me fli

¹³ “Ruaj se i kushton flitë e tua të shkrumbimit në çfarëdo vendi që të duket, ¹⁴ por vetëm në atë vend që Zoti ta ketë zgjedhur në njërën ndër fiset e tua, aty kushtoji flitë e tua të shkrumbimit dhe bëj gjithçka të urdhëroj unë. ¹⁵ Por, kurdo të të pëlqejë të hash mish, prej e ha mish me bekimin e Zotit, Hyjit tënd, që ta ketë dhënë, në çdo qytet tënd. Mund të hajë i papastërti dhe i pastërti asi mishi siç hahet mishi i sutës dhe i kaprollit, ¹⁶ me përjashtim të gjakut; atë derdhe si ujin në tokë. ¹⁷ Por në qytetet e tua nuk guxon të hash të dhjetat e drithit, të verës e të vajit tënd, të përlindurit e bagëtive të tua të trasha e të imëta dhe asgjë prej atyre që i kushton as flitë vullnetare, as ndihmesat e duarve te tua: ¹⁸ por ata haji në praninë e Zotit, Hyjit tënd, në atë vend që ta ketë zgjedhur Zoti, Hyji yt, haji ti e biri yt e bija jote, skllavi yt e skllavja jote dhe leviti që jeton në qytetin tënd; e do të gëzohesh në praninë e Zotit, Hyjit tënd, për gjithçka të ketë ndërmarrë dora jote. ¹⁹ Ruaj se nuk kujdesesh për levitin gjatë gjithë kohës sa të jetosh në tokën tënde.

²⁰ E kur t’i ketë zgjeruar Zoti, Hyji yt, kufijtë e tu, siç të ka thënë, e të kesh dëshirë të hash mish sipas ëndjes së zemrës sate, ha mish sa të dëshirojë zemra jote. ²¹ Nëse vendi që e ka zgjedhur Zoti, Hyji yt, për të banuar Emri i tij, është larg, prej bagëtive të tua, të trasha ose të imëta, prej çfarë të ketë dhënë Zoti ‑ siç të kam urdhëruar ‑ e ha në qytetet e tua sipas dëshirës sate. ²² Haje po ashtu siç hahet mishi i sutës dhe i kaprollit; le të hanë i pastërti e i papastërti së bashku. ²³ Porse ruaju të mos e hash gjakun; sepse gjaku është jeta e tyre dhe prandaj bashkë me mish nuk bën ta hash edhe shpirtin. ²⁴ Mos e ha, por derdhe në tokë si ujët. ²⁵ Mos e ha që të jesh mirë ti e bijtë e tu pas teje, pasi bën mirë para syve të Zotit.

²⁶ Kurse gjërat që t’i kesh shuguruar ose t’ia kesh kushtuar Zotit, merri e eja në atë vend që ta ketë zgjedhur Zoti, ²⁷ dhe kushtoji flitë e tua të shkrumbimit, mishin e gjakun përmbi lterin e Zotit, Hyjit tënd; gjaku i theroreve të tua le të derdhet mbi lter, kurse mishin haje vetë.

²⁸ Mbaji e dëgjoji të gjitha që po t’i urdhëroj, e do të jesh i lumtur ti e bijtë e tu pas teje përgjithmonë, nëse do të bësh ç’është e mirë dhe e pëlqyeshme para syve të Zotit, Hyjit tënd.”

Kundër kultit të kananenjve

²⁹ “Kur Zoti, Hyji yt, t’i ketë shpërndarë para fytyrës sate popujt te të cilët do të shkosh për t’i bërë pronë, pasi t’i kesh bërë pronë e të banosh në tokën e tyre, ³⁰ ruhu se bie në leqet e tyre, pasi të jenë shpartalluar ata me hyrjen tënde, e i kërkon mënyrat si i kanë nderuar idhujt e thua: ‘Siç i nderuan zotat e tyre këta popuj, po ashtu do t’i nderoj edhe vetë.’ ³¹ Mos u sill në mënyrë të ngjashme me Zotin, Hyjin tënd! Ata bënë të gjitha poshtërsitë që i neveriten Zotit, Hyjit tënd, saqë hyjnive të tyre u dogjën si fli deri edhe bijtë e bijat e veta!

Kapitujt