Kapitujt

Ligji i Përtërirë: 15. Viti shtunor

¹ “Në fund të çdo të shtatit vit, fali borxhet. ² Ja, ç’është Falja: kur i afërmi ose vëllai i ndokujt ka ndonjë gjë borxh, huadhënësi nuk mund t’ia kërkojë borxhin, sepse është viti i Faljes për nder të Zotit. ³ Prej të huajit mund ta kërkosh borxhin, por jo prej bashkëqytetarit e të afërmit, s’ke të drejtë ta kërkosh borxhin. ⁴ Assesi s’bën të ketë te ti skamnor, sepse Zoti, Hyji yt, do të të bekojë në tokën që ka për të ta dhënë për pronë, ⁵ nëse do ta dëgjosh zërin e Zotit, Hyjit tënd, dhe nëse do ta zbatosh pikë për pikë këtë urdhërim që unë po ta jap sot, ⁶ sepse Zoti, Hyji yt, do të të bekojë siç ka premtuar.

⁷ Nëse ndonjë vëlla yti, që banon në ndonjë nga qytetet në tokën që Zoti, Hyji yt, do të ta japë ty, bie në skamje, mos u bëj zemërgur dhe mos e rrudh dorën tënde, ⁸ por hape atë për vëllanë tënd skamnor e huaji çka ka nevojë ai. ⁹ Ruhu të të mos gënjejë rastësisht mendimi i pashpirtë e të thuash në zemrën tënde: ‘Po afrohet viti i shtatë i faljes’ dhe t’i largosh sytë e tu prej vëllait tënd skamnor dhe të mos i japësh sa të të kërkojë hua. Ai do të këlthasë te Zoti kundër teje, e ky do të jetë mëkat për ty. ¹⁰ Por jepi dhe të të mos trishtohet zemra jote duke e ndihmuar, sepse në saje të kësaj Zoti, Hyji yt, do të të bekojë në çdo veprim që do të ndërmarrë dora jote.

¹¹ Pasi nuk do të pushojë të ketë skamnorë në vendin e banimit tënd, së këndejmi edhe unë po të urdhëroj: hapja dorën tënde vëllait tënd të varfër, skamnorit tënd që jeton me ty në vendin tënd.”

Skllavi

¹² “Në qoftë se të është shitur vëllai yt hebre ose hebreje, pasi të ketë shërbyer për gjashtë vjet, të shtatin vit lëshoje të lirë. ¹³ Kur ta lëshosh të lirë, mos e nis duarthatë, ¹⁴ por dhuroji ndonjë gjë prej grigjës sate, prej lëmës sate e prej shtrydhësit tënd, me ato gjëra me të cilat të ka bekuar Zoti, Hyji yt, ¹⁵ Mos harro se edhe ti ke qenë skllav në tokën e Egjiptit dhe të ka liruar Zoti, Hyji yt. Prandaj edhe po të urdhëroj kështu unë.

¹⁶ Por nëse ai thotë: ‘Nuk dua të largohem prej teje’, sepse të do ty dhe shtëpinë tënde, sepse tek ti, e ndijen veten mirë, ¹⁷ merre bizin dhe shpoja veshin në derën e shtëpisë sate e le të të shërbejë përgjithmonë. Njësoj bëj edhe me skllave.

¹⁸ Mos e ki të vështirë ta lëshosh të lirë, sepse ai të shërbeu për gjashtë vjet si ta kishe pasur rrogëtar. Zoti, Hyji yt, do të të bekojë në të gjitha veprimet që do të ndërmarrësh.”

Të parëlindurit

¹⁹ “Të gjithë të parëlindurit meshkuj që do të lejnë prej bagëtive të tua të trasha e të imëta, shugugoja Zotit, Hyjit tënd, mos e shtjer në punë pjellën e parë të gjedhit tënd as mos e qeth pjellën e parë të bagëtive të tua të imëta. ²⁰ Haje ti dhe familja jote çdo vit në praninë e Zotit, Hyjit tënd, në atë vend që Zoti ta ketë zgjedhur.

²¹ Por, nëse do të ketë ndonjë të metë, nëse është i çalë ose i verbët, ose ka çfarëdo mungese tjetër, mos ia kushto Zotit, Hyjit tënd, ²² por haje brenda shtëpisë sate; le ta hajë i pastërti dhe i papastërti pa dallim, siç hahet suta ose kaprolli. ²³ Mos e ha gjakun e tyre, por derdhe në tokë si të ishte ujë.”

Kapitujt