Kapitujt

Ligji i Përtërirë: 27. Ligji u shkrua. Ceremonitë e kultit

¹ Atëherë Moisiu dhe pleqtë e Izraelit i urdhëruan popullit me këto fjalë: “Mbani çdo urdhërim që unë po ju jap sot. ² Kur ta kaloni Jordanin në tokën që Zoti, Hyji yt, do të ta japë ty, merr gurë të mëdhenj, dhe lyeji me gëlqere. ³ Në ta shkruaj të gjitha fjalët e këtij Ligji kur ta kesh kaluar Jordanin për të hyrë në tokën që Zoti, Hyji yt, do të ta japë, në tokën që rrjedh qumësht e mjaltë, siç të ka thënë Zoti, Hyji i etërve të tu. ⁴ Kur ta kaloni, pra, Jordanin, atëherë këta gurë, sipas urdhrit që unë po ju jap sot, ndreqni në malin Hebal dhe lyeni me gëlqere.

⁵ Aty ndërtoje për nder të Zotit, Hyjit tënd, një lter gurësh të paprekur nga hekuri, ⁶ të palatuar dhe aty kushtoja Zotit, Hyjit tënd, flitë e shkurmbimit. ⁷ Kushto edhe fli paqeje, ha aty e gostitu në praninë e Zotit, Hyjit tënd. ⁸ Shkruaj mirë e qartë mbi gurë të gjitha fjalët e këtij Ligji.”

⁹ Moisiu dhe priftërinjtë levitë i thanë mbarë Izraelit:

“Dëgjo me vëmendje, o Izrael! Sot je bërë populli i Zotit, Hyjit tënd! ¹⁰ Dëgjoje zërin e tij dhe zbatoji urdhërimet e ligjet e tija, që unë sot po t’i urdhëroj.”

¹¹ Atë ditë Moisiu i urdhëroi popullit e i tha:

¹² “Këta le të qëndrojnë mbi malin Garizim pasi ta keni kaluar Jordanin për ta bekuar: Simoni, Levi, Juda, Isahari, Jozefi e Beniamini. ¹³ Dhe ja, këta le të qëndrojnë mbi malin Hebal për të mallkuar: Rubeni, Gadi, Aseri, Zabuloni, Dani, dhe Neftaliu.

¹⁴ Kurse levitët, me zë të lartë, le t’u bëjnë këtë shpallje mbarë burrave të Izraelit:

¹⁵ ‘Mallkuar qoftë ai njeri që punon idhull të gdhendur ose metali të shkrirë ‑ gjë që i neveritet Zotit ‑ që s’është por vepër e dorës së mjeshtrit, qoftë edhe ta mbajë fshehur!

E mbarë populli le të përgjigjet e të thotë: ‘Amen!’

¹⁶ ‘Qoftë mallkuar ai që përbuz babain e nënën e vet!’

Mbarë populli le të thotë: ‘Amen!’

¹⁷ ‘Qoftë mallkuar ai që ia shtyn të afërmit kufirin!’

Mbarë populli le të thotë: ‘Amen!’

¹⁸ ‘Mallkuar qoftë ai që e bën të verbëtin ta humbasë rrugën!’

E mbarë populli le të përgjigjet: ‘Amen!’

¹⁹ ‘Qoftë mallkuar ai që i shkel të drejtën ardhacakut, bonjakut e vejushës!’

E mbarë populli le të thotë: ‘Amen!’

²⁰ Qoftë mallkuar kush fle me gruan e babait të vet, sepse zbulon mbulesën e shtrojës së tij!’

E mbarë populli le të thotë:’Amen!’

²¹ ‘Qoftë mallkuar kushdo fle me çfarëdo kafshe!’

E mbarë populli le të thotë:’Amen!’

²² ‘Qoftë mallkuar kush fle me motrën e vet, qoftë ajo bijë e babait, qoftë ajo bijë e nënës!’

E mbarë populli le të thotë: ‘Amen!’

²³ ‘Qoftë mallkuar kush fle me vjehrrën e vet!’

E mbarë populli le të thotë: ‘Amen!’

²⁴ ‘Qoftë mallkuar kush vret të afërmin e vet në moh!’

E mbarë populli le të thotë: ‘Amen!’

²⁵ ‘Qoftë mallkuar ai që për para vret gjakun e pafajshëm!’

E mbarë populli le të thotë: ‘Amen!’

²⁶ ‘Qoftë mallkuar kush s’do t’i mbajë fjalët e këtij Ligji dhe ai që s’do t’i vërë në zbatim!’

E mbarë populli le të thotë:’Amen!’“

Kapitujt