Kapitujt

Jobi: 14. Oh, sikur ju të dinit të heshtni

¹ Të gjitha këto që i pa syri im,

m’i ndjeu veshi, të gjitha i kuptova.

² Sa ju dini edhe vet aq di,

në asnjë gjë s’jam më i keq se ju.

³ Prapëseprapë me të Lumin dua të flas,

dëshiroj me Hyjin të bëj rragatje,

⁴ kurse juve do t’jua vërtetoj,

rrenacakë se jeni e mjekë të kotë.

⁵ Oh, sikur ju të dinit të heshtni,

kjo do të ishte për ju urtësi!

⁶ Pra dëgjojini arsyet e mia,

vëruni vesh arsyeve të buzëve të mia.

⁷ Hyj’n për ta mbrojtur a thua gënjeshtër do të thoni?

Në mbrojtje të Tij do të përdorni dredhi?

⁸ Me anësi do të silleni ju për të?

Krah mendoni Hyjit në gjyq t’i mbani?

⁹ Si do të ndaheni nëse Ai ju shqyrton?

Si njeriun doni ta mashtroni?

¹⁰ Rëndë Ai ju do t’ju ndëshkojë

për pajë të fshehtë që i mbani Atij.

¹¹ Po a s’ju tremb Madhëria e tij?

S’keni frikë se do t’ju sulet?

¹² Pluhur në erë janë të gjitha thëniet tuaja,

pancirë balte janë pancirët tuaj!

¹³ Heshtni pak! Dua të flas vetë,

të dalë ku të dalë, është punë për mua!

¹⁴ Me dhëmbë të mi pse mishin tim ta ha?

Jetën time ta shqyej me duar të mia?

¹⁵ Në dashtë le të më vrasë, tjetër s’dësh’roj:

sjelljen time para Tij ta mbroj.

¹⁶ Ky guxim shpëtimin tim kumton:

sepse i mbrapshti para Tij s’mund të dalë!

¹⁷ Dëgjojeni ju bisedën time,

vëni vesh shtjellimit tim!

¹⁸ Ja: jam gati për gjykim!

Mirë e di se i pafaj dal.

¹⁹ Kush me mua do të gjykohet?

Do të hesht dhe do të vdes.

²⁰ Por dy gjëra mos m’i bëj

para Teje s’do të tërhiqem:

²¹ flake tej prej meje dorën,

me tmerr tëndin mos më tremb!

²² Atëherë më pyet e do të të përgjigjem,

o po të pyes e ti më përgjigj!

²³ Sa faje e mëkate bëra?

Kundërvajtjet m’i trego dhe krimet!

²⁴ Përse faqen kështu ma fsheh?

Dhe më merr për armik tëndin!

²⁵ Je i ashpër me gjethe që merr era,

po e përndjek një kashtërrojë të thatë!

²⁶ Sepse më shkruan të hidhura ndëshkime,

të rinisë mëkatet m’i ngarkon,

²⁷ këmbët ndër pranga m’i mbërthen,

të gjithë hapat m’i vrojton,

të gjitha gjurmët m’i shqyrton.

²⁸ Porsi rrëshiq më duhet të mbaroj,

porsi petku që e bren tenja.

Kapitujt