Kapitujt

Jobi: 32. Ndërhyrja e Eliuhit

/31, 40b/ Kur Jobi u dha fund fjalëve të veta, ¹ ata tre njerëz pushuan t’i përgjigjeshin, sepse Jobi e mbante veten të drejtë. ² Por atëherë u hidhërua dhe u zemërua Eliuhi, biri i Barakelit të Buzit, i fisit Ramaj. E u hidhërua në Jobin sepse thoshte për vete se ishte i drejtë para Hyjit. ³ Gjithashtu u zemërua edhe në miqtë e vet, sepse nuk ditën të gjejnë përgjigje, por vetëm e dënuan Jobin. ⁴ Këndej edhe Eliuhi priti deri sa foli Jobi, sepse ata që flisnin ishin më të moçëm. ⁵ Por, si pa Eliuhi se ata tre nuk mundën t’i përgjigjeshin, u hidhërua shumë.

⁶ Atëherë e mori fjalën Eliuhi, biri i Barakelit Buzit, dhe tha:

“Për kah mosha i ri unë jam,

kurse ju e arritët pleqërinë,

prandaj edhe frikë kisha dhe droja

t’jua tregoj mendimin tim.

⁷ Mendoja: ‘Le të flasë mosha

dhe të thinjurit dijen ta mësojnë!’

⁸ Por sa po shoh është shpirti në njerëzit,

është frymëzimi që vjen prej të Lumit,

që njerëzve u jep kuptim.

⁹ Mosha e gjatë s’e jep urtësinë

e shpesh pleqtë s’e dallojnë të drejtën.

¹⁰ Këndej dhe unë ju ftoj të më dëgjoni,

dua edhe vetë t’jua dëftoj dijen.

¹¹ Me vëmendje jua dëgjova fjalët,

urtisë suaj veshin ia vura

të zgjidhni çështjen kur sprovuat.

¹² U mundoja vesh t’ju marr.

Por mjerisht, sa unë po shoh,

ju asnjëri s’qetë të zotët

ta bindnit Jobin...

t’u përgjigjeshit fjalëve të tija!

¹³ Ruaj se thoni: ‘Gjetëm dijen,

ta dënojë Hyji e jo njeriu!’

¹⁴ Prandaj fjalë s’do të them si këto,

as si ju s’do t’i përgjigjem.

¹⁵ Mbetën të mundur, nuk përgjigjën,

nga biseda hoqën dorë.

¹⁶ Prita, por ata më s’folën,

pasi mbetën shtang pa përgjegje,

¹⁷ më takon mua tani të përgjigj,

ta dëftoj dijen që kam.

¹⁸ E kam mjaft veç fjalë për të thënë,

se më shtyt shpirti brend në krah’ror.

¹⁹ Jam fryrë si mushti i mbyllur

që i pëlcet rrëshekët e rinj!

²⁰ Do të flas që pakëz të shfrej,

buzët do të hap e do të ligj’roj.

²¹ S’do të shikoj se kush çka është,

askërkënd unë s’do të përkëdhel,

²² unë nuk di kurrsi të lurtoj:

Basi im me shpejt do të më shuante”.

Kapitujt