Kapitujt

Fjalët e urta: 3. Si mund të fitohet urtia

3

¹ Biri im, mos e harro mësimin tim

dhe zemra jote le t’i mbajë urdhërimet e mia,

² sepse do t’i bëjnë të shumta ditët e tua,

vitet e jetës sate plot mirëqenie.

³ Mirësia e besnikëria kurrë mos të lënçin!

Lidhi për qafën tënde,

shkruaj mbi rrasën e zemrës sate.

⁴ Kështu do të fitosh zë e do të kesh sukses

para syve të Hyjit e të njerëzve.

⁵ Kije shpresën në Zotin me gjithë zemrën tënde

dhe mos u mbështet në mençurinë tënde.

⁶ Kije mendjen në të në të gjitha udhët e tua

dhe ai do t’i drejtojë hapat e tu.

⁷ Mos e mbaj vetveten të urtë:

druaje Zotin e largohu të keqes.

⁸ Kjo do të jetë shëndet për trupin tënd

dhe freskim për eshtrat e tu.

⁹ Ndero Zotin me pasurinë tënde

dhe me frytet e para të të gjithë të

ardhurave të tua.

¹⁰ Drithnikët e tu do të mbushen me grurë

e vozat e tua do të mbushen plot verë.

¹¹ Mos e përbuz, biri im, disiplinën e Zotit

e mos të neveritet kur ai të qortojë,

¹² sepse Zoti qorton atë që do,

pikërisht porsi baba fëmijën që e ka për zemër.

Gëzimet e të urtëve

¹³ Lum njeriu që e fitoi urtinë,

i lumi ai që e gjeti maturinë!

¹⁴ Sepse më mirë është të fitosh atë se argjend,

fryti i saj është më i vlefshëm se ari i pastër.

¹⁵ Është ajo më e çmueshme se të gjitha perlat

dhe me të s’mund të krahasohet asnjë gjë e çmueshme:

¹⁶ në të djathtën e saj është jeta e gjatë

e në dorën e majtë pasuria e nderi.

¹⁷ Udhët e saja, udhë të bukura,

të gjitha shtigjet e saja me paqe.

¹⁸ Kush e fiton atë fiton pemën e jetës,

i lumi ai që mund ta mbajë atë!

¹⁹ Me dije Zoti ia qiti tokës themelet,

me mençuri të qëndrueshme i bëri qiejt,

²⁰ me dijen e tij plasën humnerat

edhe retë e rigojnë vesën.

²¹ Biri im, të mos zhduken këto nga sytë e tu,

ruaje mençurinë e maturinë

²² e do të jenë jetë për shpirtin tënd

e stoli për qafën tënde,

²³ e atëherë do të ecësh me guxim udhës sate

e këmba jote nuk do të marrë në thua.

²⁴ Kur të flesh frikë s’do të kesh,

do të pushosh në gjumë të qetë.

²⁵ S’ke pse t’i trembesh tmerrit të papritur

as kur të sulet rrënimi i tmerrshëm i të paudhëve,

²⁶ sepse Zoti do të jetë në krahun tënd

e do ta ruajë këmbën tënde të mos pengohet.

²⁷ Mos lër pa ia bërë veprën e mirë atij që ka nevojë

nëse je në gjendje t’ia bësh.

²⁸ Mos i thuaj mikut tënd: “Shko e eja,

nesër do të jap”, nëse menjëherë je në gjendje t’i japësh.

²⁹ Mos ia sendërgjo mikut tënd të keqen

kur ai rri me ty se të zë besë.

³⁰ Mos u zër me ndokënd pa arsye

në qoftë se ai s’të ka bërë asnjë të keqe.

³¹ Mos ia ki lakmi njeriut të padrejtë,

dhe assesi mos i ndiq udhët e tija.

³² Sepse Zotit i neveritet çdo i padrejtë

dhe ai bën shoqëri me njerëz të ndershëm.

³³ Mallkimi i Zotit është në shtëpinë e të patenzonit,

kurse banesat e të drejtëve do të bekohen.

³⁴ Ai i përqesh përqeshësit,

kurse të butëve u jep përkrahje.

³⁵ Të urtët do të trashëgojnë nderin

kurse lartësimi i të marrëve do të kthehet në turp.

Kapitujt