Kapitujt

Fjalët e urta: 4. Të zgjidhet urtia

¹ Dëgjojeni, o bij, mësimin e babait

dhe vërjani mendjen të mësoni mençurinë,

² sepse unë do t’ju jap mësim të mirë

që të mos e lini ligjin tim.

³ Sepse edhe vetë qeshë djalë babe,

i njomë e djalë dëshiri i nënës sime.

⁴ Ai edhe mua më mësonte e më thoshte:

“Ruaj fjalët e mia në zemrën tënde,

mbaj fjalët e mia e do të jetosh.

⁵ Fitoje urtinë, fitoje mençurinë,

mos i harro as mos u largo nga fjalët e gojës sime.

⁶ Mos e lësho urtinë e ajo do të të ruajë,

duaje atë dhe ajo do të të marrë nën kujdes.

⁷ Fillimi i urtisë: fitoje urtinë

dhe jep gjithçka ke e fito mençurinë.

⁸ Shtrëngoje e do të të lartësojë,

do të të japë lavdi nëse do ta pushtosh.

⁹ Mbi kokën tënde do ta vërë një kezë të hijshme

dhe do të të stolisë me një kurorë të mrekullueshme”.

¹⁰ Dëgjo, biri im, e pranoji fjalët e mia

e do të shumohen vitet e jetës sate.

¹¹ Ta tregova udhën e urtisë,

të udhëhoqa shtigjeve të së drejtës,

¹² në të cilat, kur të kesh hyrë,

nuk do të të ngatërrohen hapat e tu

dhe do të vraposh e nuk do të hasësh në pengesa.

¹³ Mbaje disiplinën, mos e lësho,

ruaje se ajo është jeta jote.

¹⁴ Ruaj se hyn në udhë të të paudhëve,

ruaj se ecën udhës së të patenzonëve.

¹⁵ Ik prej saj e ruaj se kalon nëpër të,

shmangu dhe lëre atë!

¹⁶ Sepse ata nuk i zë gjumi po nuk e vepruan të keqen,

u humb gjumi po s’dëmtuan ndokënd.

¹⁷ Sepse ata e hanë bukën e paudhësisë

dhe e pinë verën e mujshisë.

¹⁸ Udha e të drejtëve është si drita e mëngjesit,

nis e rritet deri në dritën e plotë të ditës.

¹⁹ Udha e të ligjëve është e errët,

nuk dinë se ku do të hasin në pengesa.

²⁰ Biri im, dëgjoji fjalët e mia,

prire veshin tënd në fjalët e mia.

²¹ Mos lejo të tresin prej syve të tu,

ruaji mu në loçkën e zemrës sate:

²² sepse ato janë jetë për atë që i gjen

dhe shërim për të gjithë trupin e tyre.

²³ Me më të madhin kujdes ruaje zemrën tënde,

sepse prej saj burimin e ka jeta.

²⁴ Dëboje larg teje gojën gënjyese

të rrinë larg teje buzët gënjeshtare.

²⁵ Sytë e tu le të shikojnë drejtë

dhe qerpikët e tu le të shohin drejt para teje!

²⁶ Kujdes në udhën e këmbëve të tua

dhe të gjitha udhët e tua le të jenë të peshuara,

²⁷ mos u shmang as djathtas as majtas,

ruaje këmbën tënde nga e liga.

Kapitujt