Kapitujt

Fjalët e urta: 7. Eja të dehemi me kënaqje

¹ Biri im, ruaji këshillat e mia,

mbaj në vete porositë e mia.

² Mbaji urdhërimet e mia e do të jetosh,

mësimin tim porsi beben e syrit tënd.

³ Lidhi ato në gishtat e tu,

shkruaji ato në dërrasat e zemrës sate.

⁴ Thauji urtisë: “Je motra ime!”,

e maturinë thirre: “Mikeshë!”,

⁵ që të të ruajnë prej gruas së huaj,

nga e huaja që josh me fjalët e ëmbla.

⁶ Ndërsa nga dritarja e shtëpisë sime

po vrojtoja pas roletave,

⁷ dhe ja, po shoh një djalosh të papërvojë,

vërej një të ri të pamend,

⁸ kalon udhën atje në skaj,

ecën udhës së shtëpisë së saj,

⁹ në mug, kur soset dita,

në të errëtit të natës, kur bëhet terr.

¹⁰ Dhe ja, e takon një grua,

me stoli lavireje, zemër dhelpre,

gojëmbël, e çuar peshë

¹¹ thellë e shqetësuar

që në shtëpi s’mund t’i ndalë këmbët:

¹² Taninë rrugë, taninë sheshe,

skajeve rri e vrojton në pritë.

¹³ E kapi, e puthi djaloshin

e paturpshme i thotë në fytyrë:

¹⁴ “Kam kushtuar fli për shpëtim,

sot i kreva kushtet e mia,

¹⁵ prandaj edhe të dola në takim

me dëshirë të të shoh e të gjeta.

¹⁶ Shtratin e shtrova me mbulojë të pastër,

me çarçafë të ngjyrosur prej Egjiptit;

¹⁷ dhomën time me mirrë e përerova,

me aloé e me cinamom.

¹⁸ Eja të dehemi me kënaqje

deri në mëngjes të bëjmë dashuri.

¹⁹ Sepse burrin nuk e kam në shtëpi:

ai është nisur për një udhë të largët,

²⁰ mori me vete një kuletë me para,

në shtëpi do të kthehet me hënë të plotë.”

²¹ Me fjalë të shumta ia qiti rrjetën,

me joshjet e buzëve të saja e hoqi pas.

²² I marri e ndjek si kau që çohet në thertore,

porsi dreri kur bie në lak,

²³ deri që shigjeta t’ia shporojë mëlçinë;

porsi zogu që shkon me vrap në grackë

e s’e di se po luan me jetë.

²⁴ Pra tani, o bir, më dëgjo,

vëru vesh fjalëve të mia:

²⁵ zemra jotë të mos tërhiqet udhëve të saja,

mos u gënje shtigjeve të saja!

²⁶ Sepse shumë të plagosur për dhe i shtroi,

se ç’burra të fortë u vranë prej saj!

²⁷ Udhë që shpien në ferr është shtëpia e saj,

që depërtojnë në dhomat e vdekjes.

Kapitujt