Kapitujt

Fjalët e urta: 12. 1 Kush e do mësimin e do urtinë

¹ Kush e do mësimin e do urtinë,

kurse kush i urren qortimet, është i marrë.

² Kush është i mirë do të nxjerrë hir prej Zotit,

kurse njeriun gërgas Zoti e dënon.

³ Askush nuk bëhet më i fortë me paudhësi,

kurse rrënja e të drejtëve nuk do të tundet.

⁴ Gruaja e virtytshme është kurorë për burrin e vet,

kurse e paturpshmja është kalbësirë për eshtrat e tij.

⁵ Mendimet e të drejtëve janë të drejta,

kurse këshillat e të paudhëve janë gënjyese.

⁶ Fjalët e të paudhëve pritë gjakderdhjeje,

kurse goja e të drejtëve u sjell liri.

⁷ Të këqijtë birren e sharrojnë,

kurse familja e të drejtëve qëndron e patundshme.

⁸ Njeriu fiton lavde sipas mprehtësisë së mendjes së tij,

kurse përbuzet kush është zemërkeq.

⁹ Më i mirë është një skamnor që i shërben vetvetes,

se mendjemadhi që i mungon gjithçka.

¹⁰ I drejti kujdeset për jetën e bagëtive të veta,

kurse zemra e të këqijve s’di për mëshirë.

¹¹ Kush e punon tokën e vet, do të ngihet bukë,

kurse kush vrapon pas kotësive, është i pamend.

¹² Rrjetë të këqijash është dëshira e keqbërësit,

porse rrënja e të drejtëve do të përparojë.

¹³ I keqi bie në rrjetë për shkak të mëkateve të buzëve të veta,

kurse i drejti do të shpëtojë nga ngushtica.

¹⁴ Njeriu do të mbushet me të mira nga frytet e gojës së vet,

do të shpaguhet sipas veprave të duarve të veta.

¹⁵ Të marrit sjellja e vet i duket e urtë,

porse këshillat i dëgjon kush është i urtë.

¹⁶ I marri menjëherë e dëfton zemërimin e vet,

kurse i mençuri e fsheh fyerjen.

¹⁷ Kush flet të vërtetën, tregon të drejtën,

kurse dëshmitari i rremë tradhtinë.

¹⁸ Kush flet pa peshuar, ther me shpatë,

kurse gjuha e të urtëve është shërim.

¹⁹ Buza që flet të vërtetën, qëndron përgjithmonë,

kurse gjuha që gënjen vetëm për pak kohë.

²⁰ Gënjeshtra është në zemrën e atyre që mendojnë të keqen,

kurse gëzojnë ata që këshillojnë paqen.

²¹ Të drejtin nuk e gjen asnjë e keqe,

kurse të paudhët do të mbushen me të këqija.

²² Zotit i neveriten buzët rrenacake,

kurse i pëlqejnë ata që flasin të vërtetën.

²³ Njeriu i kujtueshëm e fsheh urtinë,

kurse zemra e të pamendit e shpall marrinë e vet.

²⁴ Dora e të kujdesshmit sundon,

kurse dora e përtacit çon në nënshtrim.

²⁵ Trishtimi i brendshëm e përul burrin,

kurse lajmi i mirë e gëzon atë.

²⁶ I drejti e udhëheq drejt mikun e vet,

kurse sjellja e të padrejtëve do t’i gënjejë ata.

²⁷ Përtaci nuk do ta pjekë gjahun e vet,

pasuri të çmueshme do të ketë njeriu i kujdesshëm.

²⁸ Në udhën e drejtësisë gjendet jeta,

por ka edhe udhë të hapur që shpie në vdekje.           

Kapitujt