Kapitujt

Fjalët e urta: 13. Djali i urtë e dëgjon mësimin e t’et,

¹ Djali i urtë e dëgjon mësimin e t’et,

kurse përqeshësi nuk dëgjon qortimin.

² Nga frytet e gojës së vet njeriu do të ngihet me të mira,

kurse jeta e të paudhëve ngihet me mujshi.

³ Kush e ruan gojën e vet, ruan jetën e vet,

kurse kush flet pa u matur, birret.

⁴ Dëshiron, por gjë s’fiton përtaci,

kurse shpirti i punëtorëve do të majet.

⁵ I drejti e urren fjalën e rreme,

kurse i ligu shpërhap turp e çnderim.

⁶ Drejtësia e ruan atë që në jetë është i pafajshëm,

kurse mëkatarin e humb ligësia.

⁷ Ka nga ata që shiten për të pasur e gjë s’kanë

ka nga ata që shiten për skamnorë, e kanë pasuri të madhe.

⁸ Shpërblimi i jetës së njeriut është kamja e tij,

kurse skamnorit nuk i kërcënohet kush.

⁹ Drita e të drejtëve ndriçon shkëlqyeshëm,

ndërsa dritëza e të paudhëve do të fiket.

¹⁰ Ndër krenarët askurrë nuk ndahen grindjet,

ndërsa ndër të përvuajturit gjendet urtia.

¹¹ Pasuria e fituar shpejt e shpejt mbaron menjëherë,

e shumon ai që e mbledh pak nga pak.

¹² Shpresa që pritet tepër gjatë, e ligështon zemrën,

dëshira e plotësuar është pemë e jetës.

¹³ Kush e përbuz urdhrin, ia bën të zezën vetes,

kush e dron urdhin, do të shpërblehet.

¹⁴ Mësimi i të urtit është burim jete

për t’u shmangur nga leqet e vdekjes.

¹⁵ Maturia e shquar fiton përkrahje,

kurse udha e të patenzonëve është e ashpër.

¹⁶ Çdo njeri i urtë vepron me mençuri,

kurse i pamendi e zbulon marrinë e vet.

¹⁷ Lajmëtari i keq bie në fatkeqësi,

kurse lajmëtari besnik sjell shërim.

¹⁸ Kush braktis mësimin, gjen varfëri dhe turp,

kurse kush e pranon qortimin, do të fitojë lavdi.

¹⁹ Dëshira e plotësuar kënaq shpirtin,

të marrëve u iritet t’i shmangen të keqes.

²⁰ Kush ecën me të urtët, i urtë do të bëhet,

kurse miku i të marrëve i keq do të bëhet.

²¹ Mëkatarët i përndjek e keqja,

ndërsa të drejtët do të shpërblehen me të mira.

²² I miri lë trashëgimtar bijtë e nipat,

kurse pasuria e mëkatarit ruhet për të drejtin.

²³ Shumë ushqim në rrahat e çelur të skamnorit,

por ka edhe nga ata që sharrojnë për shkak të padrejtësisë.

²⁴ Kush e kursen thuprën, e urren djalin,

kurse kush e do, vazhdimisht e qorton.

²⁵ I drejti ha gjersa ngihet,

kurse barku i të këqijve mbetet i uritur.

Kapitujt