Kapitujt

Fjalët e urta: 22. Zëri i mirë është më i mirë se pasuria e madhe,

¹ Zëri i mirë është më i mirë se pasuria e madhe,

më shumë vlen të kesh rëndësi se ar e argjend.

² Pasaniku e skamnori takohen:

të dy i ka krijuar Zoti.

³ I mençuri e sheh të keqen e fshehet,

kurse të pamendët shkojnë përpara e sharrojnë.

⁴ Shpërblim i përvuajtërisë është frika e Zotit,

begatia, lavdia dhe jeta.

⁵ Ferra e leqe ka në udhën e mbrapshtanit,

kurse ai që e ruan jetën larg u shmanget atyre.

⁶ Mësoje djaloshin sipas udhës që do të ndjekë.

edhe kur të plaket s’do t’i shmanget asaj.

⁷ I pasuri i sundon skamnorët,

e detyrësi bëhet skllav i huadhënësit.

⁸ Kush mbjell paudhësi, do të korrë të këqija,

do të sharrojë nga shqupia e hidhërimit të vet.

⁹ Syri mirëbërës do të bekohet,

sepse jep për skamnorë prej bukëve të veta.

¹⁰ Dëboje përqeshësin e me të do të zhduket grindja,

do të pushojnë grindjet e fyerjet.

¹¹ Kush e do pastërtinë e zemrës

për hir të buzëve të veta mik do ta ketë mbretin.

¹² Sytë e Zotit e ruajnë dijen,

dhe hidhen poshtë fjalët e të paudhit.

¹³ Përtaci thotë: “Përjashta është luani,

mes rrugës do të mbetem i vrarë”!

¹⁴ Shpellë e pafund është goja e gruas së huaj,

do të bjerë brenda ai të cilin e urren Zoti.

¹⁵ Marrëzia është e lidhur për zemrën e fëmijës,

dhe thupra e ndëshkimit e largon atë.

¹⁶ E ndrydh skamnorin? Ai do ta shtojë pasurinë e vet.

I dhuron pasanikut? Vetë do të bëhesh skamnor.

III. PËRMBLEDHJE THËNIESH TË TË URTËVE

¹⁷ Prire veshin tënd e dëgjoji fjalët e të urtëve,

prire zemrën tënde drejt mësimit tim,

¹⁸ sepse do të jetë kënaqësi t’i ruash në fundin e zemrës sate

e t’i kesh të gatshme në buzët e tua!

¹⁹ Me qëllim që Zoti të jetë shpresa jote

t’i drejtoji sot edhe ty.

²⁰ Pse a s’t’i përshkrova para sa kohe

disa këshilla dhe mësime

²¹ për ta treguar fuqinë e fjalëve të vërteta,

që t’i përgjigjesh atij që të ka dërguar?

²² Mos u dëfto i mujshëm me skamnorin pse është i varfër,

as mos e ndrydh të papasurin në pleqëri,

²³ sepse vetë Zoti do ta marrë në dorë çështjen e tyre

dhe do t’ua marrë shpirtin atyre që i plaçkisin.

²⁴ Mos ki miqësi me njeriun idhnak,

as mos bëj shoqëri me njeriun e dërhuzdtë,

²⁵ që të mos mësohesh udhëve të tija

e t’i vësh lak jetës sate.

²⁶ Mos ji ndër ata që japin dorën,

që hynë dorëzanë për borxhe:

²⁷ Nëse s’ke me çka ta kthesh

ç’arsye ke që të të merret shtroja jote?

²⁸ Ruaj se i luan kufijtë e moçëm

që i kanë vënë të parët e tu.

²⁹ A e ke parë njeriun mjeshtër të punës së vet?

I tilli qëndron përballë mbretërish,

ai s’rri në shërbim të njerëzve të pandershëm.

Kapitujt