Kapitujt

Fjalët e urta: 27. Mos u lavdëro për të nesërmen

¹ Mos u lavdëro për të nesërmen

pasi s’e di se ç’do të të sjellë dita.

² Le të lavdërojë dikush tjetër e jo goja jote,

një i huaj, por jo buzët e tua.

³ I rëndë është guri, e rëndë është rëra,

por më i rëndë se të dy është zemërimi i të marrit.

⁴ Egërsi e zemërimi shpërthyes

dhe kush mund t’i qëndrojë përballë mendjes së zezë?

⁵ Më i mirë është qortimi ballafaqe

se dashuria e rreme.

⁶ Më të mira janë plagët e atij që të do

se të puthurat tradhtare të atij që të urren.

⁷ I ngopuri e shkel me këmbë edhe hojen e mjaltit,

kurse të uriturit çdo gjë e hidhur i vjen e ëmbël.

⁸ Porsi zogu që e ka humbur çerdhen e vet,

i tillë është njeriu që endet larg vendit të vet.

⁹ Me erëra të mira e me kem kënaqet zemra,

kështu edhe ëmbëlsia e mikut që këshillon çiltërisht.

¹⁰ Mos e braktis mikun tënd e mikun e babait tënd

dhe mos hyr në shtëpinë e vëllait tënd ditën e fatkeqësisë sate.

Më i mirë është fqinji afër se vëllai larg.

¹¹ Biri im, bëhu i urtë dhe ma gëzo zemrën,

që të mund t’i përgjigjem atij që më shan.

¹² I urti e sheh të keqen e fshihet,

kurse të marrët vazhdojnë përpara e ndëshkohen.

¹³ Merrja leshnikun atij që hyri dorëzanë për të huajin,

merrja pengun atij në vend të të huajit.

¹⁴ Kush më zë të lartë e bekon fqinjin herët në agim,

i numërohet sikurse e mallkon.

¹⁵ Pullazi që pikon në ditë të të ftohtit

dhe gruaja grindavece janë si njëra‑tjetra.

¹⁶ Ta ndalësh? Më sa mund të ndalet era

ose me dorë të mbahet vaji!

¹⁷ Hekuri me hekur mprehet

edhe njeriu në takimin me fqinjin e vet.

¹⁸ Kush e ruan fikun do të hajë prej frutave të tij,

edhe kush e ruan zotërinë e vet do të nderohet.

¹⁹ Sikurse uji është pasqyrë për fytyrë

ashtu zemra e njeriut për njeriun.

²⁰ Nëntoka dhe Shfarosja kurrë nuk mbushen,

ashtu edhe sytë e njeriut kurrë nuk ngihen.

²¹ Sikurse argjendi që provohet në shkritore e ari në furrë,

ashtu edhe njeriu nga goja e atyre që e lëvdojnë.

²² Edhe nëse e rreh të marrin si elbin në shterë me shtypës

prej tij nuk do të hiqet marria.

²³ Me vëmendje njihe gjendjen e bagëtive të tua,

me zemër kujdesohu për grigjat,

²⁴ sepse pasuria nuk është e përhershme.

Pse, a thua se kurora trashëgohet brez pas brezi?

²⁵ Mblidhet sana, del bari i gjelbër

e mblidhet tagjia prej bjeshkëve;

²⁶ atëherë do të kesh qengjat për veshje

e kecat për të blerë arën

²⁷ dhe s’do të të mungojë qumësht dhish për vete

as për ushqim të familjes e për shujtë të shërbëtoreve të tua.

Kapitujt