Kapitujt

Fjalët e urta: 31. Fjalët e Lamuelit

31

¹ Fjalët e Lamuelit, mbretit të Masës,

që ia mësoi e ëma:

² Mos biri im! Mos biri i zemrës sime!

Mos biri i kushteve të mia,

³ mos ua jep grave pasurinë tënde,

jetën tënde atyre që i rrënojnë mbretërit!

⁴ Nuk u ka hije mbretërve, o Lamuel,

nuk u ka hije mbretërve të pinë verë

as princave t’u lakmojnë pijeve të forta,

⁵ sepse, duke pirë, e harrojnë ligjin

dhe e tradhtojnë të drejtën e njerëzve të mjerë.

⁶ Jepni pije alkoolike atij që do të sharrojë

e verë atyre që e kanë shpirtin në trishtim:

⁷ le të pijë e le ta harrojë mjerimin e vet

dhe s’do të kujtohet më për vuajtjen e vet.

⁸ Hape gojën për të mirën e të pagojit

e për të gjithë ata që i ka shkelur fati!

⁹ Hape gojën për të gjykuar drejt,

jepja të drejtën nevojtarit e skamnorit.

IX. ZONJA E PËRSOSUR E SHTËPISË

Alef

¹⁰ Ku mund të gjendet një grua vërtet burrneshë?

Është shumë më e çmueshme se gurët e paçmueshëm.

Bet

¹¹ Zemra e burrit të saj ka besim në të

dhe pasuria nuk do t’i mungojë.

Gimel

¹² Ajo i bën mirë e kurrë keq

në të gjitha ditët e jetës së vet.

Dalet

¹³ Ajo gjen lesh e li

e punon hareshëm me duar të veta.

He

¹⁴ Ajo është si anija tregtare

që sjell ushqim prej së largu.

Vau

¹⁵ Ajo zgjohet me natë

për t’ua bërë gati robëve të shtëpisë ushqimin

e për t’ua caktuar punën shërbëtoreve.

Zain

¹⁶ Ia lëshon syrin një are? E blen atë.

Me frytin e duarve të veta mbjell vreshtin.

Het

¹⁷ Me fuqi i ngjesh ijët e veta

e me forcë i luan krahët në punë.

Tet

¹⁸ E sheh dobinë e punës së vet

dhe dritëza e saj nuk fiket kurrë natën.

Jod

¹⁹ Furkën e merr në dorë

e me gishta e sjellë boshtin.

Kaf

²² Shuplakat e veta i ka hapur për nevojtarin

dhe ua ngjet dorën të mjerëve.

Lamed

²¹ S’e dron të ftohtët e borës për familjen e vet:

të gjithë anëtarët e familjes i kanë nga dy palë petka.

Mem

²² Për vete ajo punon shtrojë e mbulojë;

petkat e saja janë prej liri të hollë e mëndafshi.

Nun

²³ Burri i saj ndahet në shenjë në Log të kuvendit,

kur rri me krerët e vendit.

Samek

²⁴ Bën pëlhurë dhe ëshet,

tregtarit kananeas breza i shet.

Ain

²⁵ Është e kërthnestë në shëndet e plot madhëri,

e pret të nesërmen me buzë në gaz.

Fe

²⁶ Kur hap gojën flet urti,

në gjuhën e saj: mësim përshpirtërie.

Sade

²⁷ Vëren me kujdes sjelljet e anëtarëve të familjes

dhe s’e ha bukën e përtacisë.

Kof

²⁸ Bijtë e saj ngriten për ta shpallur të lume

e burri i saj e lavdëron e thotë:

Res

²⁹ “Shumë gra kanë vepruar burrërisht,

por ti ua ke kaluar të gjithave!”     

Sin

³⁰ Hijeshia është e rreme e bukuria është e kotë:

gruaja që e druan Zotin, ja, e cila duhet lavdëruar!

Tau

³¹ Le t’i gëzojë frytet e duarve të veta,

le ta lavdërojnë para popullit

Kapitujt