Kapitujt

Ezekieli: 18. Përgjegjësia vetjake

¹ Më qe drejtuar kjo fjalë e Zotit:

² “Pse shkoni duke e përsëritur në tokën e Izraelit këtë thënie:

‘Etërit hëngrën rrushin e thartë

e të bijve u mpihen dhëmbët’?

³ Pasha jetën time ‑ thotë Zoti Hyj ‑ kurrë më s’do ta përsëritni këtë fjalë në Izrael! ⁴ Ja, çdo jetë është imja: si jeta e babait, ashtu edhe jeta e birit është imja, njeriu që do të mëkatojë, ai do të vdesë.

⁵ Njeriu që është i drejtë, që kryen drejtësinë e të drejtën, ⁶ që nuk ha në lartësi, që s’i lartëson sytë drejt idhujve të Izraelit, që nuk e çnderon gruan e të afërmit, që nuk i afrohet gruas në gjendjen e mujoreve të saj, ⁷ që nuk i bën dhunë njeriut, që ia kthen detorësit pengun, që nuk cubnon, që i jep bukë atij që s’ka, që e vesh të zhveshurin, ⁸ që s’huajon me ujem, që nuk kërkon shtesë, e ruan dorën nga paudhësia, pleqëron drejt ndërmjet njërit e tjetrit, ⁹ që ecën urdhërimeve të mia, që i mban gjyqet e mia për të bërë të vërtetën: ky është i drejtë dhe i tilli do të jetojë ‑ është fjala e Zotit Hyj.

¹⁰ Por në qoftë se i lind djali cub, vrastar, që bën ndonjë nga këto, ¹¹ e i ati nuk i bën këto ‑ kurse i biri ha në lartësi, dhunon gruan e të afërmit, ¹² keqtrajton nevojtarin e skamnorin, cubnon, nuk e kthen pengun, i lartëson sytë e vet drejt idhujve, bën turpësi, ¹³ huajon me ujem, merr shtesë, a thua do të jetojë? Jo, s’do të jetojë! Pasi i bën të gjitha këto poshtërsi, patjetër do të vdesë: gjaku i tij mbi të do të bjerë.

¹⁴ Por, në qoftë se i lind djali që i sheh të gjitha mëkatet që i ka bërë i ati, ka frikën e Zotit e nuk bën si ai, ¹⁵ nuk ha në lartësi, sytë e vet nuk i lartëson drejt idhujve të shtëpisë së Izraelit, nuk e çnderon gruan e të afërmit të vet, ¹⁶ askënd nuk keqtrajton, nuk e ndalon pengun, nuk bën cubni, i jep bukën e vet të uriturit, të zhveshurin e vesh, ¹⁷ e ruan dorën e vet nga padrejtësia, s’huajon me ujem e me shtesë, i zbaton rregulloret e mia, ecën urdhërimeve të mia ‑ ky nuk do të vdesë për shkak të paudhësive të babait të vet, por do të jetojë. ¹⁸ Pasi i ati ka qenë i dhunshëm dhe cub dhe nuk ka bërë mirë në mes të popullit të vet, ja, vdiq në fajësinë e vet. ¹⁹ Ju thoni: ‘Pse s’u përgjigj i biri për fajin e të atit?’ Por biri ka zbatuar të drejtën e drejtësinë, i mbajti të gjitha urdhërimet e mia dhe të gjitha i bëri vepër, këndej edhe do të jetojë. ²⁰ Ai që mëkaton do të vdesë: djali s’do të përgjigjet për fajet e të atit, as babai s’do të përgjigjet për fajet e të birit. Të drejtit do t’i takojë drejtësia e të paudhit paudhësia.

²¹ Por, në qoftë se i paudhi pendohet për të gjitha mëkatet e veta që i ka bërë dhe i mban të gjitha urdhërimet e mia, e bën të drejtën e drejtësinë, po, do të jetojë, nuk do të vdesë! ²² Asnjë prej mëkateve të tij që ka bërë nuk do t’i kujtohet; do të jetojë në saje të drejtësisë që bën. ²³ Vallë, a thua i kënaqem vdekjes së mëkatarit ‑ është fjala e Zotit Hyj ‑ e jo që të kthehet nga sjellja e vet e të jetojë?

²⁴ Por, në qoftë se i drejti largohet nga drejtësia e vet dhe bën padrejtësinë e të gjitha turpësitë që i bën i patenzoni, vallë a do të jetojë? Asnjë prej drejtësive të tij që i ka bërë, nuk do t’i merren parasysh; për shkak të pabesisë së vet me të cilën e theu besën e të mëkatit që e bëri, në to do të vdesë. ²⁵ Ju thatë: ‘Nuk është e drejtë udha e Zotit’. Dëgjoni, pra, shtëpia e Izraelit: A thua mënyra e sjelljes sime vërtet s’është e mirë? Apo më parë mënyra e veprimit tuaj është e keqe? ²⁶ Sepse, kur i drejti e lë drejtësinë e vet e bën padrejtësinë, ai do të vdesë: për shkak të padrejtësisë që bëri, do të vdesë. ²⁷ E kur i paudhi kthehet prej paudhësisë së vet që e ka bërë, e bën të drejtën e drejtësinë, ai ia kthen jetën vetvetes: ²⁸ ai pleqëron imët dhe kthehet nga të gjitha padrejtësitë që i ka bërë, këndej do të jetojë e, jo, nuk do të vdesë. ²⁹ Thotë shtëpia e Izraelit: ‘S’është e drejtë mënyra e veprimit të Zotit’. A thua mënyra e sjelljes sime vërtet nuk qenka e drejtë? Apo më parë mënyra e veprimit tuaj është e keqe?

³⁰ Prandaj, unë do t’ju gjykoj të gjithëve, secilin sipas mënyrës së veprimit të vet, o shtëpia e Izraelit ‑ thotë Zoti Hyj. Kthehuni dhe ndrequni nga të gjitha paudhësitë tuaja dhe paudhësia s’do të jetë më shkak për rënien tuaj. ³¹ Flakni larg jush të gjitha pabesitë tuaja, me të cilat u bëtë të pabesë e përtëriteni zemrën e shpirtin tuaj? Përse të vdisni, shtëpia e Izraelit? Unë nuk i kënaqem vdekjes së vdekatarit ‑ thotë Zoti Hyj. Kthehuni e jetoni!

Kapitujt