Kapitujt

Osea: 10. Zhdukja e shenjave idhujtare të Izraelit

10

¹ Shermendmadhe hardhi Izraeli,

jepte fruta me mbushulli;

sipas shumësisë së frutave të saj,

edhe lterët i shumoi,

sipas begatisë së tokës së vet,

i stolisi tempujt e vet.

² Zemrën e vet e ka të ndarë,

s’do të vonojnë, do ta paguajnë!

Zoti lterët do t’ua thyejë,

tempujt e tyre do t’i rrënojë!

³ Atëherë ata kanë për të thënë:

‘Nuk kemi mbret,

sepse nuk e dreshtëm Zotin.

Po mbreti për ne ç’do të bënte?’

⁴ Rrahin me buzë,

be bëjnë rrejshëm,

bëjnë besëlidhje;

do të mbijë e drejta

porsi helmi në hulli të arës!

⁵ Për viçin e Betavenit

samarianët i kapën të dridhurat,

po e vajton populli i tij,

priftalecat e tij po e qajnë,

për lavdinë e tij

që vërtet po zhduket!

⁶ Sepse u çua në Asyri

mbretit të madh porsi dhuratë;

Efraimin do ta mb’lojë turpi,

për këshill të vet do të skuqet Izraeli.

⁷ E pat Samaria,

mbreti i saj kashtërrojë mbi ujë!

⁸ Do të rrafshohen lartësitë e turpshme,

mëkati i Izraelit!

Do të ngallitin ferrë, hallugë

përmbi lterët e tyre!

Atëherë maleve do t’u thonë:

‘Na mbuloni!’

edhe kodrave:

‘Mbi ne bini!’.

Kundër Gabaasë

⁹ Që prejditëve të Gabaasë

mëkatoi Izraeli;

vendit s’luajti.

A s’do t’i zërë, thua, në Gabaa

lufta kundër bijve të fajit?

¹⁰ Do t’i ndëshkoj pas dëshirës sime!

Kundër tyre do të bashkohen popujt,

kur të ndëshkohen për të dy fajet.

Kërcënime e grishje për kthim

¹¹ Efraimi është mëshqerrë e mësuar

që i pëlqen të shijë grurë.

Të buk’rën qafë në zgjedhë ia mbërtheva;

Efraimin në parmendë e mbreha,

do të lëvrojë Juda,

në trinë do ta zë Jakobin.

¹² Drejtësinë mbillni

dashuri do të korrni!

Tokë të re çelni:

është koha Zotin të kërkoni

derisa të vijë

e ta zbrazë mbi ju drejtësinë.

¹³ Lëvruat paudhësinë,

korrët padrejtësinë,

hëngrët frytin e gënjeshtrës;

shpresove në karrocat e tua,

e në shumicën e ushtarëve të tu,

¹⁴ kryengritja në popull tënd do të çohet,

do të shkretohen fortesat e tua,

si e shkretoi Salmani Betarbeelin

në ditë të luftës,

kur nëna mbi fëmijë shkapatej!

¹⁵ Ja, çfarë Beteli do t’ju bëjë

për shkak të t’tmerrshmes fajësi tuaj.

Në mëngjes do të vritet mbreti i Izraelit.

Kapitujt