Kapitujt

Joeli: 4. Gjykimi i popujve

4

¹ Sepse, ja, ndër ato ditë

e në atë kohë,

kur ta përmirësoj fatin

e Judës e të Jerusalemit,

² do t’i mbledh të gjithë popujt

e do t’i çoj në fushën e Jozafatit.

Atje do të bëj gjyq me ta

lidhur me popullin tim,

Izraelin, pronën time,

që i shpërndanë nëpër kombe

dhe e ndanë tokën time.

³ Mbi popullin tim hodhën short,

i ndërruan djelmoshat me lavire,

vajzat i shitën për verë e pinë!

Paditje kundër fenicianëve e filistenjve

⁴ Çfarë mendoni në të vërtetë, të më bëni ju, Tir e Sidon, dhe mbarë krahinat e Filistesë? Pse, a thua doni të më hakmerreni? Po edhe nëse do të hakmerreni kundër meje, unë aspak pa u vonuar, hakmarrjen tuaj do ta sjell mbi kokën tuaj!

⁵ Sepse ju jeni ata që e morët argjendin tim, arin tim dhe i mbartët dhe i çuat gjërat e mia të çmueshme në tempujt tuaj, ⁶ ju që ua shitët bijtë e Judës e të Jerusalemit grekëve për t’i tretur sa më larg prej atdheut të tyre, ⁷ ja, pra, unë do t’i çoj nga vendi ku ju i shitët dhe hakmarrjen tuaj do ta kthej mbi kokën tuaj. ⁸ Do t’i shes bijtë tuaj e bijat tuaja me dorë të bijve të Judës. Do t’ua shesin sabenjve, një populli të largët. Sepse kështu ka folur Zoti.

Grishja të mblidhen popujt

⁹ Shpalleni këtë ndër popuj:

shenjtërohuni për luftë!

Çoni në këmbë trimat!

Le të vijnë, le të sulen

të gjithë luftëtarët!

¹⁰ Ktheni plorët tuaj në shpata,

drapërinjtë tuaj në heshta,

le të thotë i ligshti:

‘Trim i fortë jam unë!’

¹¹ Shpërtheni e ejani,

të gjithë popujt e rrethit

dhe këtu bashkohuni!

Silli, o Zot, trimat e tu!

¹² Le të çohen e le të ngjiten të gjitha kombet

në fushën e Jozafatit,

sepse aty do të ulem të gjykoj

të gjitha kombet përreth!

¹³ Në dorë merrni drapërinjtë,

sepse u poqën të korrat!

Ejani e shtrydhni

se shtrydhësi është plot:

tinarët po ngufin e derdhen,

kaq e madhe ështe e keqja e tyre!

¹⁴ Popuj, o popuj,

në Luginën e Vendimit,

sepse është afër Dita e Zotit

në Luginën e Vendimit!

Dita e Zotit

¹⁵ U terratisën diell e hënë,

yjet e humbën shkëlqimin e vet!

¹⁶ Ulërin Zoti nga Sioni,

i jehon zëri nga Jerusalemi;

dridhen qielli edhe toka!

Për popull të vet strehim është Zoti,

fortesë për bij të Izraelit!

¹⁷ Do ta dini se unë jam Zoti,

Hyji juaj,

që banoj në Sion,

Malin tim të shenjtë!

Vendi i shenjtë do të jetë Jerusalemi,

n’për të s’do të kalojnë më të huajt!

III. KOHA PARAJSORE E RIPËRTËRITJES SË IZRAELIT

¹⁸ Atë ditë

malet do të rigojnë musht,

dhe me qumësht do të rrjedhin kodrat,

të gjithë përrenjtë e Judës

do të rrjedhin ujë;

prej Shtëpisë së Zotit do të dalë burimi

do ta ujitë luginën Setim.

¹⁹ Egjipti shkretëtirë do të bëhet,

Idumeja e përzhitur dhe e djegur

për dhunë të bërë bijve të Judës,

pse gjak të pafajshëm derdhën në tokë të tyre.

²⁰ E Judeja përherë do të banohet,

prej breznie në brezni Ruzalemi!

²¹ Gjakun e tyre do ta marr,

s’do ta lë hupës t’u shkojë,

në Sion Zoti do të banojë.

Kapitujt