Kapitujt

Zbulesa: 11. Dy dëshmitë

¹ Atëherë m’u dha një kallam që i ngjante shkopit dhe m’u tha: »Ngrihu dhe mate tempullin e Hyjit, lterin dhe ata që adhurojnë në të!

² Avllinë që është përjashta tempullit lëre mënjanë dhe mos e mat, sepse ajo iu la paganëve që do ta shkelin qytetin e shenjtë për dyzet e dy muaj.

³ Unë do të dërgoj dy dëshmitarë të mi, të veshur me petk zie e pendese dhe do të profetizojnë një mijë e dyqind e gjashtëdhjetë ditë.

⁴ Ata janë dy ullinj dhe dy shandanë që qëndrojnë para Zotëruesit të dheut.

⁵ Nëse ndokush do t’u bëjë keq, nga goja e tyre del zjarr dhe i përpin armiqtë e tyre.

Për të vërtetë, nëse ndokush do t’i dëmtojë, do të mbarojë në këtë mënyrë!

⁶ Këta kanë pushtet ta mbyllin qiellin të mos bjerë shi në ditët kur ata profetizojnë; gjithashtu kanë pushtet ta shndërrojnë ujin në gjak dhe të sjellin mbi dhe çdo plagë, sa herë të duan.

⁷ Kur ta kryejnë dëshmimin e vet, Egërsira që del nga Humnera, do të bëjë luftë me ta, do t’i mundë dhe do t’i vrasë.

⁸ Kufomat e tyre do të rrinë mbi dhe në tregun e qytetit të madh që simbolikisht quhet Sodoma dhe Egjipti, ku edhe Zotëria i tyre qe kryqëzuar.

⁹ Njerëzit prej të gjithë popujve, prej të gjitha fiseve, prej të gjitha gjuhëve dhe prej të gjitha kombësive do t’i shikojnë kufomat e tyre për tri ditë e gjysmë; nuk do të lejojnë të varrosen kufomat e tyre.

¹⁰ Banorët e tokës do të gëzohen dhe do të galdojnë për të keqen e tyre dhe njëri-tjetrit do t’i japin dhurata, sepse këta dy profetë i munduan banorët e tokës.

¹¹ Por pas tri ditësh e gjysmë, shpirti që sjell jetën, i ardhur prej Hyjit, hyri në ta dhe ata u ngrtën në këmbë.

Atëherë një frikë e madhe i kapi të gjithë ata që i shihnin. .

¹² Dëgjuan një zë të madh që prej qiellit u thoshte profetëve: »Ngrituni! Ejani këtu!« Ata përmbi re u ngjitën në qiell në sy të armiqve të vet.

¹³ Në atë moment ra një tërmet i madh dhe një e dhjeta pjesë e qytetit u rrafshua për dhe e në këtë tërmet sharruan shtatë mijë vetë.

Ata që shpëtuan i mbuloi tmerri dhe i dhanë lavdi Hyjit të qiellit.

¹⁴ »Vaj-i« i dytë kaloi.

Dhe ja, »Vaj-i« i tretë po vjen pa vonesë!

Trumbeta e shtatë

¹⁵ Edhe engjëlli i shtatë i ra trumbetës: në qiell jehuan zëra të mëdhenj që thoshin: »U vendos mbi rruzull Mbretëria e Zotit tonë dhe e Krishtit të tij!

Dhe do të mbretërojë në shekuj të shekujve!«

¹⁶ Atëherë njëzet e katër udhëheqësit që rrinin në fronet e veta para Hyjit, ranë përmbys dhe e adhuruan Hyjin ¹⁷ e thanë: »Po të falënderojmë, o Zotëri, Hyj i Gjithëpushtetshëm, ty që je, ty që ishe, sepse e ushtrove fuqinë tënde të madhe dhe e more mbretërimin!

¹⁸ Paganët u hidhëruan, por arriti zemërimi yt! Erdhi koha të gjykohen të vdekurit, koha e shpërblimit për shërbëtorët e tu profetët, për shenjtërit dhe për të gjithë ata që e druajnë Emrin tënd - për të vegjël e të mëdhenj - dhe që të shfarosen ata që e prishin dheun!«

¹⁹ Atëheë u hap tempulli i Hyjit që është në qiell dhe u duk Arka e Besëlidhjes së tij në tempullin e tij, shpërthyen vetëtima, gjëmë e rrufe, tërmet dhe breshër i madh!

Kapitujt