Kapitujt

Gjoni: 16. Veprimi i Shpirtit Shenjt

16

¹ Jua thashë këto

që të mos moliset feja juaj.

² Do t’ju përjashtojnë prej sinagogave.

Edhe më! Po vjen koha,

kur secili, që t’ju vrasë,

të mendojë se i bën shërbesë Hyjit.

³ E do të veprojnë kështu,

pse nuk e njohën as Atin as mua.

⁴ Jua tregova këto gjëra

që, kur të vijë koha,

t’ju bjerë ndër mend se jua pata thënë.”

Veprimi i Shpirtit Shenjt

“Nuk ju fola për këto që në fillim,

sepse isha me ju,

⁵ por tani po shkoj tek Ai, që më dërgoi,

dhe askush prej jush s’po më pyet: ‘Kah po shkon?’

⁶ por, pse ju thashë këto,

zemrat tuaja u mbushën me trishtim.

⁷ Por, unë po ju them të vërtetën:

është më mirë për ju të shkoj,

sepse, po s’shkova,

Mbrojtësi nuk do të vijë te ju,

kurse, po shkova,

do ta dërgoj te ju.

⁸ E kur të vijë Ai,

do ta vërtetojë se bota e ka gabim

në lidhje me mëkatin, me drejtësinë dhe me dënimin.

⁹ Në lidhje me mëkatin

‑ pse nuk besojnë në mua,

¹⁰ në lidhje me drejtësinë,

‑ pse po shkoj tek Ati

dhe nuk do të më shihni më.

¹¹ Në lidhje me dënimin

pse princi i kësaj bote u dënua.

¹² Kam edhe shumë të tjera për t’ju thënë

por tani s’mund t’i kuptoni.

¹³ E kur të vijë ai ‑ Shpirti i së Vërtetës ‑

Ai do t’ju udhëzojë ta njihni tërë të Vërtetën.

Ai s’do të flasë prej vetvetes,

por do të flasë çka të dëgjojë

dhe do t’ju zbulojë të ardhmen.

¹⁴ Ai do të më lëvdojë,

sepse do të marrë prej simes

e do t’ju zbulojë juve.

¹⁵ Gjithçka ka Ati, është imja.

Prandaj edhe ju thashë:

‘Merr prej simes

dhe do t’ju zbulojë juve’.”

Mjerimi kthehet në gëzim

¹⁶ “Edhe pak kohë e nuk do të më shihni,

prapë edhe pak e do të më shihni.”

¹⁷ Atëherë disa nga nxënësit e tij i thanë njëri‑tjetrit: “Çka është kjo që po na thotë: ‘Edhe pak kohë e nuk do të më shihni, prapë edhe pak e do të më shihni?’ dhe ‘Po shkoj tek Ati?’“ ¹⁸ Thoshin, pra: “Çka është [ajo që thotë] ‘Edhe pak kohë?’. S’po e marrim vesh çka do të thotë!” ¹⁹ Jezusi e mori vesh se deshën ta pyesnin e u tha:

“Ju po e pyesni njëri‑tjetrin rreth asaj që thashë:

‘Edhe pak kohë e nuk do të më shihni më

e prapë edhe disa kohë e do të më shihni’?

²⁰ Për të vërtetë, për të vërtetë po ju them:

ju do të qani e do të vajtoni

e bota do të gëzojë.

Ju do të trishtoheni,

por trishtimi juaj do të kthehet në gëzim.

²¹ Gruaja, kur i lind fëmija, është në trishtim,

sepse i erdhi ora e saj,

porse, pasi i lind fëmija,

nuk i bie më ndërmend vuajtja

prej gëzimit që lindi një njeri në botë.

²² Kështu edhe ju: tani jeni të trishtuar,

por unë prapë do të vij t’ju shoh

e zemra juaj do të galdojë

dhe askush s’do t’jua marrë gëzimin tuaj.

²³ Atë ditë nuk do të më pyetni më për asgjë.

Përnjëmend, përnjëmend po ju them:

çdo gjë që t’i kërkoni Atit në emër tim,

do t’jua japë.

²⁴ Deri tani asgjë nuk kërkuat në emër tim.

Kërkoni dhe do të merrni

që gëzimi juaj të jetë i plotë.”

Unë e kam mundur botën

²⁵ “Këto jua thashë në shëmbëlltyra.

Po vjen koha,

kur nuk do t’ju flas më në shëmbëlltyra,

por haptazi do t’ju shpall për Atin.

²⁶ Atë ditë keni për të lypur në emër tim,

e nuk po them se unë do t’i lutem Atit për ju,

²⁷ sepse vetë Ati ju do,

pasi ju më deshët mua

e besuat se dola prej Hyjit.

²⁸ Dola prej Atit dhe erdha në botë,

prapë po e lë botën e po kthehem tek Ati.”

²⁹ Nxënësit thanë:

“Tani po flet haptazi e nuk po përdor kurrfarë shëmbëlltyre.

³⁰ Tani e dimë se di gjithçka e nuk është nevoja të pyesë ndokush. Prandaj besojmë se dole prej Hyjit.”

³¹ Jezusi u përgjigj:

“Tani besoni?

³² Ja, po vjen koha ‑ madje arriti ‑

kur ju të shpërndaheni secili në punë të vet

e mua të më lini vetëm.

Por, unë nuk jam vetëm,

sepse me mua është Ati.

³³ Jua thashë këto që ta keni paqen në mua.

Në botë keni vuajtje,

por mos u trembni

‑ unë e munda botën!”

Kapitujt