Kapitujt

1 i Mbretërve: 4. Zyrtarët e lartë të Salomonit

¹ Mbreti Salomon ishte mbret mbi mbarë Izraelin. ² Zyrtarët e tij të lartë ishin këta: Azaria, biri i Sadokut, ishte prift; ³ Elihorefi dhe Ahia, bijtë e Sisës, skribë; Jozafati, biri i Ahiludit, sekretar; ⁴ Banaja, biri i Jojadës, i parë mbi ushtrinë, kurse Sadoku e Abiatari, priftërinj; ⁵ Azaria i Natanit, në krye të qeveritarëve; Zabudi, biri i Natanit, prift dhe mik i mbretit; ⁶ kurse Ahisari, drejtor i oborrit mbretëror e Adonirami, biri i Abdës, përgjegjës i angarisë e i tatimeve.

Qeveritarët e Salomonit

⁷ Salomoni kishte në mbarë Izraelin dymbë‑ dhjetë qeveritarë, të cilët nozullonin mbretin dhe shtëpinë e tij: një muaj në vit secili prej tyre e pajiste mbretin me gjithçka kishte nevojë.

⁸ Dhe ja emrat e tyre:  

Benhuri në Malet e Efraimit;

⁹ Bendehari në Maces, në Salebim, në Betsames, në Elon e në Betanan;

¹⁰ Benhesedi në Arubot, atij i takonte Sokoja dhe mbarë toka Efer;

¹¹ Benabinadabi, të cilit i përkiste mbarë krahina Dor; e kishte për grua Tafetin, bijën e Salomonit.

¹² Bana, biri i Ahiludit, që sundonte Tanakun, Magedon dhe mbarë Betsanin, që është afër Sartanit, nën Jezrahelin, që nga Betsani e deri në Abelmehulë dhe deri përtej Jekmaamit; 

¹³ Bengaberi në Ramot të Galaadit i kishte fshatrat Jair, të birit të Manaseut në Galaad: ai ishte në krye të mbarë krahinës Argob, që është në Basan: në krye të gjashëdhjetë qyteteve të mëdha e të rrethuara me mure dhe me shula bronzi;

¹⁴ Ahinadabi, biri i Ados, ishte i parë në Mahanaim;

¹⁵ Akimaasi në Neftali. Edhe ky kishte bijën e Salomonit, Basematën, për grua.

¹⁶ Baana, biri i Husiut, në Aser e në Baalot;

¹⁷ Jozafati, biri i Faruehut, në Isahar;

¹⁸ Semei, biri i Elës, në Beniamin;

¹⁹ Gaberi, biri i Uriut, në tokën e Galaadit, në tokën e Sehonit, mbretit të amorrenjve dhe të Ogut, mbretit të Basanit.

Përkrye kësaj ishte edhe një qeveritar tjetër në Judë.

²⁰ Juda e Izraeli ishin të panumërt, porsi rëra që është në bregun e detit me shumicë: hanin e pinin e gëzonin.

Kapitujt