Kapitujt

Jeremia: 27. Veprimi simbolik me zgjedhën dhe kumtim mbretërve të Perëndimit

¹ Në fillim të mbretërisë së Sedecisë, birit të Jozisë, mbretit të Judës, kjo fjalë i qe drejtuar prej Zotit Jeremisë: ² ”Kështu më thotë Zoti: puno për vete litarë e një zgjedhë dhe mbërtheje në qafën tënde. ³ E çoji fjalë mbretit të Edomit, mbretit të Moabit, mbretit të bijve të Amonit, mbretit të Tirit e mbretit të Sidonit me anë të lajmëtarëve, të cilët kanë ardhur te Sedecia, mbreti i Judës, në Jerusalem. ⁴ Urdhëroji t’u thonë zotërinjve të vet: Kështu thotë Zoti i Ushtrive, Hyji i Izraelit: Kështu thuajuni zotërinjve tuaj: ⁵ Unë e krijova tokën, njeriun dhe kafshët që janë përmbi sipërfaqen e tokës, me fuqinë time të madhe e me krahun tim të shtrirë dhe ia dhurova atij që u pëlqeu syve të mi. ⁶ E tani për tani unë i lashë të gjitha këto vende në dorë të Nabukodonozorit, mbretit të Babilonisë, shërbëtorit tim. Për më tepër në duar të tij i lashë edhe egërsirat e malit që t’i shërbejnë. ⁷ Të gjithë popujt do t’i shërbejnë atij e birit të tij dhe birit të birit të tij, derisa t’i vijë dita edhe atij e tokës së tij: atij do t’i shërbejnë popuj të shumtë e mbretër të mëdhenj. ⁸ Ai popull dhe ajo mbretëri që nuk do t’i nënshtrohet Nabukodonozorit, mbretit të Babilonisë, secili që nuk do ta përkulë qafën e vet nën zgjedhën e mbretit të Babilonisë, unë do ta ndëshkoj atë popull ‑ është fjala e Zotit ‑ me shpatë, me uri e me murtajë derisa ta kem asgjësuar në duart e tij. ⁹ Ju pra, mos i dëgjoni profetët tuaj, shortarët, ëndërruesit, falltarët e magjistarët që ju thonë: ‘S’do të bini në skllavëri të mbretit të Babilonisë’, ¹⁰ sepse ju profetizojnë rrena, që t’ju largojnë nga vendi juaj, që unë t’ju dëboj e të sharroni. ¹¹ Kurse popullin që do ta mbërthejë zverkun e vet në zgjedhën e mbretit të Babilonisë e do t’i shërbejë, do ta lë të rrijë i qetë në vendin e vet ‑ është fjala e Zotit ‑ do ta lëvrojë atë e do të banojë në të.”

¹² Edhe Sedecisë, mbretit të Judës, i kam folur po të njëjtat fjalë e i kam thënë: “Përuleni qafën tuaj nën zgjedhën e mbretit të Babilonisë, shërbejini atij dhe popullit të tij e do t’ju shpëtojë jeta. ¹³ Përse të vdisni ti dhe populli yt nga shpata, uria e murtaja, siç ka thënë Zoti për popullin që s’do të dojë t’i shërbejë mbretit të Babilonisë? ¹⁴ Mos i dëgjoni fjalët e profetëve që ju thonë: ‘S’do të bini nën skllavëri të mbretit të Babilonisë’, sepse ata ju flasin rrena. ¹⁵ Sepse ata unë nuk i kam dërguar ‑ është fjala e Zotit ‑ ata rrejshëm profetizojnë në emër tim, që unë t’ju përbuz e të sharroni, si ju, ashtu edhe profetët që ju profetizojnë.”

¹⁶ Po edhe priftërinjve dhe këtij populli i kam folur kështu: “Kështu thotë Zoti: Mos i dëgjoni fjalët e profetëve tuaj, që ju profetizojnë e thonë: ‘Ja, enët e Shtëpisë së Zotit tashti së shpejti do të kthehen këtu prej Babilonisë!’ Ata ju profetizojnë rrena! ¹⁷ Pra, mos i dëgjoni, por shërbejini mbretit të Babilonit, që të jetoni. Përse të bëhet shkretëtirë ky qytet? ¹⁸ Në qoftë se janë profetë dhe po qe se fjala e Zotit është në ta, le të ndërmjetësojnë, pra, te Zoti i Ushtrive që të mos shkojnë në Babiloni enët që kanë mbetur në Shtëpinë e Zotit e në pallatin e mbretërve të Judës e në Jerusalem!” ¹⁹ Sepse kështu thotë Zoti i Ushtrive lidhur me shtyllat, me detin, me bazat e me enët e tjera, që mbetën në këtë qytet, ²⁰ të cilat nuk i mori Nabukodonozori, mbreti i Babilonisë, kur e shpërnguli Jehoninë, birin e Joakimit, mbretin e Judës, nga Jerusalemi në Babiloni bashkë me të gjithë bujarët e Judës e të Jerusalemit. ²¹ Sepse kështu thotë Zoti i Ushtrive, Hyji i Izraelit, në lidhje me enët, që janë lënë në Shtëpinë e Zotit, në shtëpinë e mbretit të Judës e në Jerusalem: ²² ‘Do të çohen në Babiloni dhe atje do të qëndrojnë deri në ditën që unë të shkoj për to ‑ është fjala e Zotit ‑ e të bëj që të merren e të kthehen në këtë vend. ’“

Kapitujt