Kapitujt

Jeremia: 29. Letra të shpërngulurve

¹ Ja fjalët e letrës që Jeremia profet ia dërgoi nga Jerusalemi Tepricës së të shpërngulurve ‑ krerëve, priftërinjve, profetëve e mbarë popullit, të cilët i shpërnguli nga Jerusalemi Nabukodonozori dhe i çoi në Babiloni, ² pasi ishin nisur nga Jerusalemi mbreti Jekonia, zonja mbretëreshë, bujarët e pallatit, prijësit e Judës e të Jerusalemit, mjeshtër e argjendarë. ³ Letra i qe dërguar për dorë të Elasës, birit të Safanit, e të Gamarisë, birit të Helcisë, të cilët i dërgoi Sedecia, mbreti i Judës, te Nabukodonozori, mbreti i Babilonisë, në Babiloni.

Në letër thoshte:

⁴ “Kështu u thotë Zoti i Ushtrive, Hyji i Izraelit, të gjithë të humburve që i shpërngula nga Jerusalemi në Babiloni: ⁵ Ndërtoni shtëpi dhe banoni në to; mbillni kopshte e hani frutat e tyre; ⁶ martohuni e lindni djem e vajza; merruni djemve tuaj gra, martojini vajzat tuaja, e të lindin bij e bija e shtohuni atje e mos u pakësoni! ⁷ Kërkojeni të mirën e vendit ku ju kam tretur e luteni Zotin për të, sepse në mirëqenien e tij qëndron edhe e mira juaj. ⁸ Sepse kështu thotë Zoti i Ushtrive, Hyji i Izraelit: Mos lejoni t’ju bëjnë të gaboni profetët që janë në mesin tuaj, dhe shortarët tuaj, dhe mos kini besim në ëndrrat tuaja që ju i ëndërroni, ⁹ sepse ata ju parakallëzojnë rrena në emër tim, e pra, unë nuk i dërgova ata ‑ është fjala e Zotit. ¹⁰ Sepse kjo është fjala e Zotit: Vetëm kur të mbushen shtatëdhjetë vjetët në Babiloni, vetëm atëherë do të vij t’ju shoh e do ta çoj në vend premtimin tim se do t’ju riatdhesoj. ¹¹ Sepse unë e di mirë synimin që e kam me ju ‑ është fjala e Zotit ‑ synime paqeje e jo mjerimi: synoj t’ju jap pasardhësi dhe shpresë. ¹² Ju do të më thirrni në ndihmë e do të vini tek unë; do të më luteni dhe unë do t’ju dëgjoj. ¹³ Do të më kërkoni e do të më gjeni sa herë që të më kërkoni me zemër të çiltër. ¹⁴ Do të lejoj të gjendem prej jush ‑ është fjala e Zotit ‑ dhe do të bëj të marrë fund skllavëria juaj, do t’ju bashkoj nga të gjithë popujt e nga të gjitha vendet, në të cilat ju pata tretur ‑ është fjala e Zotit ‑. Unë do të bëj të ktheheni në vendin, nga i cili ju pata shpërngulur.

¹⁵ E vërtet ju thoni: ‘Zoti na ngriti profetë në Babilon... ’,

¹⁶ Ja, veç, se çka thotë Zoti për mbretin që rri mbi fronin e Davidit, për mbarë popullin, banorët e këtij qyteti, vëllezërit tuaj, të cilët nuk qenë tretur bashkë me ju në mërgim, ¹⁷ kështu thotë Zoti i Ushtrive: Ja, po dërgoj mbi ta shpatën, urinë e murtajën; do t’i bëj si fiq të prishur që s’mund të hahen ngaqë janë shumë të këqij. ¹⁸ Do t’i përndjek me shpatë, me uri e me murtajë e do t’i bëj tmerr për të gjitha mbretëritë e tokës, shenjë mallkimi, habie, pëshpëritjeje dhe turp për të gjithë popujt, ku unë i flaka, ¹⁹ sepse nuk deshën t’i dëgjojnë fjalët e mia ‑ është fjala e Zotit ‑ që ua dërgova me anë të profetëve, shërbëtorëve të mi vazhdimisht pa u lodhur, por ju s’më dëgjuat ‑ është fjala e Zotit ‑. ²⁰ Por ju, o mërgimtarë, dëgjojeni të gjithë fjalën e Zotit, që po jua dërgoj nga Jerusalemi në Babilon.

²¹ Kështu i thotë Zoti i Ushtrive, Hyji i Izraelit, Akabit, birit të Kolisë, e Sedecisë, birit të Maasisë, që në emër tim ju profetizojnë rrejshëm: Ja, unë do t’i lë në duar të Nabukodonozorit, mbretit të Babilonisë, dhe do t’i godasë ndër sytë tuaj. ²² Me ta si me nëmë do të mallkojnë të gjithë të treturit e Judës në Babiloni e do të thonë: Qofsh mallkuar si Sedecia e si Akabi, që mbreti i Babilonisë i poqi në zjarr!’, ²³ për arsye se bënë poshtërsi në Izrael dhe kurorëthyerje me gratë e miqve të vet e rrejshëm e folën fjalën time në emër tim, që unë nuk u kam urdhëruar. Unë e di këtë dhe jam dëshmitar i kësaj gjëje ‑ është fjala e Zotit.”

Reagimi i një të treturi ndaj letrës së Jeremisë

²⁴ E Semejë Nehelamitajt thuaji: ²⁵ Kështu thotë Zoti i Ushtrive, Hyji i Izraelit: Për arsye se në emër tënd i ke dërguar mbarë popullit që është në Jerusalem si edhe priftit Sofoni, të birit të Maasisë, dhe të gjithë priftërinjve një letër, ku thua: ²⁶ Zoti të ka vënë prift në vend të priftit Jojadë për të qenë mbikëqyrës në Tempullin e Zotit mbi çdo njeri kryekëcyer që don të luajë rolin e profetit e për ta hedhur në pranga e në hekura. ²⁷ Pse atëherë nuk e ke ndëshkuar botërisht Jereminë nga Anatoti që po shitet ndër ju për profet? ²⁸ Sepse, përmbi të gjitha, ai edhe neve na shkruan në Babiloni: ‘Do të kalojë shumë kohë e gjatë! Ndërtoni shtëpi e banoni në to, mbëltoni kopshte e hani frytet e tyre!’“

²⁹ Prifti Sofoni ia lexoi letrën Jeremisë profet. ³⁰ Po atëherë Jeremisë i qe drejtuar fjala e Zotit e i tha: ³¹ Dërgoju të gjithë të treturve këtë lajm: Kështu i thotë Zoti Semejës Nehelamit: Pasi Semeja ju profetizoi pa e pasë dërguar vetë, dhe ai ju bëri të keni besim në gënjeshtër, ³² prandaj kështu thotë Zoti: Unë do ta ndëshkoj Semejën e Nehelamit e mbarë farën e tij; askush prej farës së tij s’do të rrijë në mes të këtij populli; s’do ta shohë të mirën që unë do t’ia bëj popullit tim ‑ është fjala e Zotit ‑ sepse ka predikuar kryengritjen kundër Zotit.”

Kapitujt