Kapitujt

Fjalët e urta: 5. Të ikurit e gruas së huaj dhe dashuria e vërtetë e të urtit

¹ Biri im, vështroje urtinë time

dhe prire veshin tënd në arsyet e mia,

² që ta ruash pamjen e qartë të tyre

dhe buzët e tua do ta ruajnë disiplinën.

³ Hoje mjalti pikojnë buzët e të huajës,

më e pastër se vaji gusha e saj,

⁴ porse në fund është më e idhët se absinti,

e pret më zi se shpata me dy tehe.

⁵ Këmbët e saja në vdekje zbresin,

gjurmët e saja çojnë në Nëntokë.

⁶ Ajo s’është në kujdes për udhën e jetës,

hapat e saj enden pa e ditur se nga.

⁷ Tani pra, më dëgjo, o bir,

mos u shmang nga fjalët e gojës sime!

⁸ Larg saj kije udhën tënde

e mos u afro derës së shtëpisë së saj,

⁹ që të mos ua japësh të tjerëve nderin tënd

vitet e tua njeriut mizor,

¹⁰ që kamja jote të mos pasurojë të huajt,

mundi yt të hyjë në shtëpi të të huajit;

¹¹ që të mos dënesësh pastaj në fund

kur të shkatërrohet mishi e trupi yt

¹² e të thuash: “Pse e urreva disiplinën,

zemra ime pse i përbuzi qortimet?

¹³ Pse s’e dëgjova zërin e mësuesve të mi,

pse s’u vura vesh atyre që më mësonin?

¹⁴ Për pak s’rashë në çdo të keqe

në mes të mbledhjes e të bashkësisë”!

¹⁵ Pi ujë prej ublës sate,

prej burimeve të pusit tënd,

¹⁶ që burimet e tua të mos derdhen përjashta

e të mos rrjedhin rrëke rrugëve!

¹⁷ Ruaji vetëm për vete

e të mos bëhen të huajt pjesëtarët e tu!

¹⁸ Le të jetë i bekuar burimi yt

e gëzo me gruan e rinisë sate:

¹⁹ le të jetë për ty drenushë e dashur,

sorkadhe e hijshme,

përkëdheljet e saja le të gëzojnë përherë,

dashuria e saj le të kënaqë gjithmonë.

²⁰ Pse, o bir, të ngashnjehesh nga e huaja,

përse të ngrohësh në prehrin e gruas së huaj?

²¹ Sepse para syve të Zotit janë udhët e njeriut,

ai i vren të gjitha gjurmët e tija.

²² Të ligun do ta zënë vetë paudhëritë e tija

dhe do të lidhet me litarët e mëkateve të veta.

²³ Ai do të vdesë pse i mungon disiplina,

do të sharrojë prej marrëzisë së madhe të vetes.

Kapitujt